Сәрсенбі, 16 қаңтар күні Шәкәрім атындағы үш тілде оқытатын көпбейін-ді гимназияда «Инновациялық менеджмент – білім сапасын арттырудың негізі» атты облыстық тәжірибе алмасу семинары өтті. Семинарға қалалық, аудандық білім бөлімдерінің басшылары, лицей және гимназия директорлары, әдістемелік кабинет меңгерушілері қатысты.
Семинарға қатысуш{jcomments off}ылар «Рухани жаңғыру» бағдарламасын, «Менің мектебім» жобасын, үш тілде білім беру жүйесін мектеп бағдарламасына енгізудегі тәжірибелерімен бөлісті. Білім бөлімінің басшысы Наталия Фесенконың өткен жылды қорытындылаған есебінен соң қонақтар Шәкәрім атындағы гимназияға экскурсия жасап, көрме алаңдарының жұмысымен танысты, «Эрудит Kids», «Жұлдыз Ардақ» балабақшаларына, №49 мектепке барып, өзара пікір алмасты.
Бүгінде Семей өңірінде 49 қала және 19 ауыл мектептері, 130 білім беру мекемелері мен ұйымдар бар. Білім бөлімі басшысы Наталия Фесенконың айтуынша, жыл сайын 60 мың бала дүниеге келетініне қарамастан, 3-6 жас аралығындағы балаларды мектепке дейінгі білім беру мекемелерімен қамтуда орын тапшылығы байқалмайды. Қалада 56 балабақша болса, оның 42-сі жекеменшік екен. Өткен жылы 7 жаңа балабақша ашылып, оның 5-еуі сенімді басқаруға берілген. Келесі жылы балабақшалардың материалдық-техникалық базасын жабдықтауға 290 млн. теңге қаржы бөлінбек.
— Жыл соңында мемлекеттік-жекеменшік серіктестік аясында 320 және 280 орынға арналған екі балабақша және қаңтар айының басында «Эрудит Kids» атты тағы бір балабақша ашылды. Қажеттіліктің азаюына байланысты жаз мезгілінде 33 шағын орталық жабылды,- дейді Н.Фесенко.
Семейдегі орта білім беру мекемелерінің 67-сі мемлекеттік болса, 2-еуі — жекеменшік. Мектептердің 27-сі қазақ тілінде, 7-еуі орыс тілінде, 36-сы қос тілде білім беруде.
— Семей өңірінде 48 мыңнан астам оқушы білім алуда. Өткен жылы 1200 және 600 орынға арналған екі жалпы білім беретін мектеп ашылып, №№11, 39, 22, 19 мектептердің үш ауысымда оқу жүктемесі азайтылды. Таяуда Степной кентінен 300 орынға және Шығыс кентінен 1200 орынға арналған мектеп ашу жоспарлануда, қазір жобалық-сметалық құжаттары әзірленуде,- дейді білім бөлімінің басшысы.
2019 жылы қалалық білім бөлімі инклюзивті білім беруді, шағын комплектілі мектептерді дамыту бағытындағы жұмыстарды жалғастырмақ.
Жадыра ТӨЛЕГЕНҚЫЗЫ, «Семей таңы»
