Жексенбі, 20 қаңтар күні қаланың белсенді жастары әкімдіктің мәжіліс залында шаһар басшысымен еркін форматта кездесу ұйымдастырып, Жастар жылын өткізуге байланысты ойларын ортаға салды.
Жастар ресурстық орталығының басшысы Олжас Соғымбайдың жетекшілігімен өткен кездесуде қала жастары Ермак Бидахмет{jcomments off}ұлын шайға шақырып, шүйіркелесе отырып өздерін толғандырған сауалдарын қоюға мүмкіндік алды.
Олар флешмобтар мен акцияларды мүмкіндігінше азайтып, мәдениет, спорт, денсаулық сақтау, қоғамдық көлік салалары бойынша, сондай-ақ қолжетімді баспана алуға қатысты жеңілдіктер қарастыру туралы қала басшысымен уағдаласты. Жастардың интеллектуалдық қабілеттерін арттырып, рухани құндылыққа тәрбиелеу жұмыстарын іске асыру жайлы бастама көтерді. Әлеуметтік жағынан аз қамтылған және талантты жастарға қала әкімінің оқу гранттары мен арнайы шәкіртақы тағайындау туралы ұсыныс айтылып, биылғы жылы жастардың игілігіне берілетін әлеуметтік нысандардың тізімі жасалды.
— Әдетте, аптаның жұмыс күндері әкімнің кабинетіне кіріп, шаруаңды шешу былай тұрсын, жоспарлы іс-шараларға шақыру мүмкін болмай жатады. Қоғамдық қабылдауға бізден де басқа жазылғандар жетіп артылады. Біз бүгін басқа жолын таптық. Демалыс күні жастар болып жиылып, шаһар басшысын шайға шақырдық. Бұл басқосу бұрынғыдан өзгерек. Әлгі әкімдіктегі мәжіліс залы шағын шайханаға ауысты. Ең бастысы, ойлағанымыздай, еркіндікті сезіне алдық. Өз басым студент кезімде өзімді толғандырып жүрген мәселелерді қала басшылығына тікелей жеткізіп, жауап алсам деп армандайтынмын. Бүгінгі жастарға осындай пікір алмасу алаңын ұйымдастыра алғанымызға қуаныштымын. Ендігі кезек өзімізде. Басталған іс — жартылай біткен іс. Ал біткен іске сыншы көп болады,- дейді қалалық Жастар ресурстық орталығының басшысы Олжас Соғымбай.
Ал Сіз Жастар жылынан не күтесіз, құрметті оқырман?
Жадыра ТӨЛЕГЕНҚЫЗЫ, «Семей таңы»
