Қалалық дене шынықтыру және спорт бөлімінің басшысы Мұрат Құржықаев өткен жылды қорытындылап, жергілікті БАҚ өкіл-дері алдында есеп берді.
{jcomments off}
Баспасөз мәслихатында айтылғандай, өткен 2018 жылы Семейде ойын және футбол алаңдарын, спорт залдарды қосқанда 16 спорт нысаны пайдалануға берілген. Бейбітшілік аралында жаңа мәдени-спорт кешені ашылып, «Цементник» стадионы қайта жөнделген. Бүгінгі күні Семейде 390-нан астам спорттық нысан бар.
Әрине, өткен жылдың есте қалар маңызды оқиғасы — «Абай Арена» мәдени-спорт кешені құрылысының басталуы. Бұған дейін Семейде мұндай ірі нысан болмағаны белгілі. Биылғы жылдың басында қаладағы дене шынықтыру және спорт саласында тағы бір маңызды оқиға орын алмақ. Ол — Қарағайлы тұрғын алабында жабық мұз кешені құрылысының басталуы. Құрылыс жұмыстары көктемде басталып, 2020 жылы аяқталмақ.
— Семейде Қысқы спорт сарайының салынуын біз көптен күттік. Климаттық ерекшеліктерге байланысты қаладағы спортшылардың қысқы спорт түрлерінен жаттығуы үш айдан әрі аспайды. Нысан пайдалануға берілген соң шаһарда мәнерлеп сырғанау спорты дамиды деген сенімдеміз. Қысқы спорт кешенінің ішкі мұз айдыны 400 метрлік жолмен, екі хоккей кортымен қамтылады. Керлинг, шорт-трек секілді жаңа спорт түрлерінен де спортшыларымызды дайындай бастаймыз,- дейді М.Құржықаев.
Оның айтуынша, өткен жылы семейлік спортшылар 1600-ден астам қалалық, облыстық және республикалық жарыстарға қатысқан. 2018 жылы жерлес балуандар Қазақстан чемпионатында Конфедерация кубогын ұтып, жеңімпаз атанды. Өз кезегінде бұл жеңіс бес семейлік спортшының ұлттық құрама сапына алынып, таяуда өтетін Олимпиада ойындарына қатысуларына мүмкіндік сыйлады. Сондай-ақ осы жылы айтулы балуан Айбек Нұғымаров «Әлем барысы» турнирінде чемпиондық белбеуді жеңіп алса, Индонезияда өткен Азия ойындарында 4 спортшы қоладан алқа таққан. Өскемен қаласында өткен халықтық ойындарда Семей құрамасы күміс жүлдеге қол жеткізген.
— Өткен жыл жемісті болды. Енді алдағы міндеттерді айқындауымыз керек.
Биылғы жылы біз дене шынықтыру және спортпен жүйелі түрде айналысатын отбасылардың санын арттырып, спорт алаңдарын көбейтуді мақсат етіп отырмыз. Озерки ауылында хоккей кортын салу жоспарымызда бар. Біздің базалық хоккей командасы осында жаттығатын болады. Инвесторлар қаланың сол жағалауынан хоккей модулін салғысы келеді. Сонымен қатар қалалық сәулет және құрылыс бөлімі «Спартак» стадионын күрделі жөндеуден өткізу үшін жоба дайындауда. Стадионда автоматты түрде суарылатын және жылытылатын газон болады, жүгіру жолы ауыстырылады. Келешекте мұнда ауқымды жарыстар өткізуге үміттіміз,- деді М.Құржықаев.
Айтолқын САМАТ
