Мемлекет басшысы Нұрсұлтан Назарбаев Қазақстан халқына арнаған «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында 2019 жылды «Жастар жылы» деп жариялауды ұсынған болатын. Сәрсенбі, 23 қаңтар күні Астанадағы «Нұр әлем» павильонында Елбасының қатысуымен осы Жастар жылының ашылуына арналған «Тәуелсіздік ұрпақтары» атты бейресми алқалы жиын өтті. Елбасының өзі жастар арасына галстуксіз келіп, алдымен олар көтерген мәселелерді, тың ұсыныстарды байыппен тыңдады. Тікелей эфирде өткен жиынды еліміздің барлық өңірінің жастары онлайн режимде тамашалады.
Кешке әртүрлі саланың үздік жастары қатысып, Елбасыға ұсыныстарын жеткізді.
Осы форумда «Дарын» жастар сыйлығының иегері, жерлесіміз, Қазақстан Жазушылар Одағының Семей филиалының төрағасы, ақын Мерей Қарт елімізде «Әдебиет академиясын» ашуды ұсынды.
— Сөз орайында Қазақстан Жазушылар одағы ұсынған бірегей жоба туралы айтқым келеді. Әдебиет әлемінде жаңа кеңістік ашу мақсатында жас қаламгерлерге арналған «Әдебиет академиясын» ашуды ұсынамын. Әдебиет академиясы ашылса, жас ақын-жазушыларымыз білімін шыңдап, әлем философтарының, мәдениеттанушыларының ілімін бойына сіңіріп, әдебиетіміздің әлеуеті артып, тың өріс алуына септігін тигізер еді. Сол кезде жас қаламгерлер жаһандық бәсекеге қабілетті шығармаларды дүниеге әкелер еді,- деп Мерей Қарт өз сөзін өлеңіымен түйіндеді.
САЙЫПҚЫРАН САҚТЫҢ ҰЛЫМЫН!
Арқыраса тарпаң күреңім,
Бал-бұл да жанар түр-өңім.
Көнеден қалған көзімсің,
Күміс көмкерген жүгенім.
Өмілдірігім де дін аман,
Өн бойын ою құраған.
Омырау тұсы шашақ бау,
Астары – қызыл шұғадан.
Көшпенді елміз көшелі.
Маңдай бақ біткен бес елі.
Құйысқанымда — құйма алтын,
Өркениетім ғой кешегі.
Жаратып мінген күлігін,
Сайыпқыран Сақтың ұлымын!
Үзеңгімен-ақ үзгенбіз,
Қарсы шапқан қасқыр жұлынын.
Тақым қажамас таралғым,
Зерленген шеті – сары алтын.
Былғары — бекзат тоқымым,
Осы күнге аман оралдың.
Шөлдесем — қымыз ішкенім.
Шипасы қандай күшті едің!
Ат терін адал сімірген,
Жабағы жүнді ішпегім.
Қайыңнан шапқан қапталым,
Жәдігерімдей сақтадым.
Іңірге тізгін қаңтарып,
Ізгінің күттім ақ таңын!
Қанжығам – құтты қайыстан.
Шыңдалғам көкпар — сайыстан.
Бес жастан шауып бәйгеге,
Жанарымнан жасыл жай ұшқан.
Қамшым да – қызыл тобылғы,
Соққызба, тағдыр, санымды.
Келер ғасырға аттандым,
Оңғарса Тәңір жолымды!
«СТ-ақпарат»
{jcomments off}
