{jcomments off}Дүйсенбі, 21 қаңтар күні қаламыздағы Ядролық медицина және онкология орталығында жатыр мойны обырының алдын алу апталығына орай баспасөз отырысы өтті. Шараға Семей қаласының Ядролық медицина және онкология ортағының директоры Марат Сандыбав, емдеу ісі бойынша директордың орынбасары Баян Бекетова, ҰӘЖ бойынша директордың орынбасары Нұргүл Жұмықбаева және БАҚ өкілдері қатысты.
Қазақстанда жыл сайын 1200-ге жуық әйел жатыр мойны обырына шалдықса, оның ішінде 80-ге жуығынан қатерлі ісіктің дәл осы түрі Семей өңірінде анықталады екен.
Репродуктивті жүйенің қатерлі ісіктері арасында жатыр мойны обыры сүт безі қатерлі ісігінен кейінгі екінші орынға шыққан. Ал, жалпы, қатерлі ісік ауруларының ішінде аталмыш ауру түрі жетінші орында тұр.
— Жатыр мойны обыры көруге болатын локализация ауруына жататынына қарамастан, әйелдердің 25 пайызы, яғни біздің өңірдегі әрбір төртінші әйелде осы патологияның үшінші, төртінші сатыларында анықталады. Аталмыш дертке шалдыққандар 40-50 жастағылар, дегенмен соңғы жылдары 40 жасқа толмаған әйелдер арасында бұл сырқаттың өсуі байқалады,- дейді Семей қаласының Ядролық мединицина және онкология орталығының директоры Марат Сандыбав.
Обырдың пайда болу себептері көп. Түсік жасату, иммунитеттің төмен болуы, жатыр мойнының жаралары мен жыныс жолдарының инфекциялары және жыныстық қатынасқа ерте түсу, темекі шегу қатерлі дерттің пайда болуына ықпалын тигізеді.
— Күн сайын елімізде жатыр мойны обырынан екі әйел адам адам көз жұмады. Олардың тең жартысы репродуктивті жастағы, яғни жас әйелдер. 100% жағдайда жатыр мойны обырын адамның папиллома вирусының анкогендік штамдары тудырады. Мұндағы басты мәселе – вирусты жұқтырған науқаста ауру белгілері байқалмайды. Сондықтан да «жатыр мойнындағы қатерлі ісік» деген диагноз әйелдер үшін қашанда төбеден жай түскендей әсер етеді. Бұл дерт тек медициналық тексеру нәтижесінде анақталады. Дегенмен жаңадан пайда болған қатерлі ісік бірден ұлғайып кетпейді, ол үшін 5-10 жыл керек. Яғни, бұл дертке шалдыққан нәзік жандылардың аурудан айығуға уақыты бар. Сондықтан уақтылы скринингтен өтіп отырғаны дұрыс,- дейді Ядролық медицина және онкологиялық орталық директорының емдеу ісі бойынша орынбасары Баян Бекетова.
Мамандардың айтуынша, Семей өңірі бойынша 2018 жылы жүргізілген скрининг нәтижесінде 2 мыңға жуық адамнан обыралды дерті анықталған. Бүгінде төрт жыл сайын 30-дан 70 жасқа дейінгі барлық әйелдер өздерінің емханаларында жатыр мойны обырына тексерілу үшін тегін скринингтен өте алады. Сонымен бірге қатерлі ісіктердің алдын алу үшін бүгінде қаламыздағы емханаларда әйелдер мен ер адамдарға арналған тексеру бөлмелері бар. Онда онкологиялық орталықта білім алған мамандар қызмет көрсетеді.
— Тексеру бөлмелерінің негізгі мақсаты — еш зерттеусіз, яғни қымбат ультрадыбыстық зерттеуді, компьютерлік томография мен магнитті-резонансты томографияны қолданбай-ақ көзбен көріп, қолмен білу арқылы диагноз қою. Жатыр мойны обырын да осындай тәсілмен анықтауға болады. Мұндай тексерілуден тұрғындар жыл сайын өтуге тиіс,- дейді ҰӘЖ бойынша директордың орынбасары Нұргүл Жұмықбаева.
Айта кетейік, жатыр мойны обырының алдын алу апталығына орай, 25 қаңтар күні сағат 9:00-ден 18:00-ге дейін Семей өңірінің барлық емханаларының гинекологиялық кабинеттерінде, Ядролық медицина және онкология орталығында Ашық есік күні өтеді. Бұл күні кез келген әйел адам орталыққа келіп, тексерілуден өте алады.
Құралай ҚАЙЫРЖАНҚЫЗЫ, «Семей таңы»
