Өткен жұма, 25 қаңтар күні Семейге «Нұр Отан» партиясы Орталық аппаратының хатшысы Қаныбек Жұмашев келіп, қала мектептері мен Электротехникалық колледж жанынан ашылған ІТ-кабинеттер мен орталықтарды аралап, жұмысымен танысып шықты. Қаныбек Бекболатұлы іссапарын Елбасының «Ұлы даланың жеті қыры» мақаласы аясында Семейде алғаш рет бастауын алған «Ұлы даланың көне сарындары» фестивалін тамашалаумен түйіндеді.
«Рухани жаңғыру» бағдарламасының «Менің мектебім» жобасы негізінде аймағымыздағы барлық толық комплектілі мектептерде Назарбаев Зияткерлік мектебінің стандарты бойынша жабдықталған 476 кабинет ашылған болатын. Оның ішінде 277 ІТ-сынып бар.
Ал Семей қаласының Электротехникалық колледжінде «Нұр Отан» партиясының қолдауымен ІТ-орталық өткен жылы жұмысын бастады. Қазір мұнда, мектеп оқушылары мен студенттерді қоспағанда, әртүрлі жастағы қала тұрғындары тегін білім алуда. Колледж мамандары сондай-ақ мектеп мұғалімдерін де мехатроника, инженерлік графика, 3D модельдеу, логикалық бақылауды бағдарлау, робототехника сынды 5 құзыреттілік бойынша дайындауда.
— Қазір өнеркәсіпте пайдаланылатын мобильді робототехниканы қолданысқа енгізу үшін пилоттық жоба әзірлеп жатырмыз. Біздің студенттеріміз колледжді бітіргеннен кейін өнеркәсіпте жұмыс істеуге дайын маман болып қалыптасады. Бүгінгі күні олар әртүрлі процестерді бағдарламалауды үйренуде. Әрине, білім ұдайы жетілдіруді қажет етеді. Сондықтан жоғары білім алып, шыңдалуға болады. Мұнда келушілер, негізінен, базалық, яғни негізгі ілімдерді меңгеріп шығады, — дейді Электротехникалық колледж жанындағы IT-орталықтың жетекшісі Самир Керимов.
Мұндағы ІТ-орталық еліміздегі ғана емес, әлемдік деңгейдегі ең қуатты компьютерлермен, «Fest» атты неміс компаниясының құрылғыларымен жабдықталыпты. Қазақстан мен шетелдің түрлі қалаларында курстан өткен 12 маман қазақ және орыс тілдерінде 5 апталық курсты жүргізуде.
— Аймағымыздағы 277 мектептен 580-ге жуық мұғалімді даярладық. Семей өңірі ғана емес, Шығыс Қазақстан облысы бойынша әр аудандағы мектеп мұғалімдері де курстан өтеді. Қазір 100 адам оқып жатыр. Келесі аптадан бастап тағы 100-ге жуық адамды қабылдаймыз, — дейді С. Керимов.
ІТ-орталық Жұмыспен қамту орталығында жұмыссыздар есебінде тіркелген тұрғындар тобымен де қарым-қатынас орнатқан. Өткен жылы аталған санаттағы 154 адам осы орталықтан сертификат алып шығыпты.
ІТ-орталықтарды аралай келе «Нұр Отан» партиясы Орталық аппаратының хатшысы Қаныбек Жұмашев бірқатар ұсыныстар айтып, халықты оқуға тарту шараларын әлі де күшейту керектігін ескертті.
Жадыра ТӨЛЕГЕНҚЫЗЫ, «Семей таңы»
