Елбасының «Ұлы даланың жеті қыры» мақаласынан туындаған «Ұлы даланың көне сарындары» атты республикалық дәстүрлі музыка фестивалінің әлқиссасы алаштың астанасы, ұлт руханиятының алтын бесігі, Абай елі — көне Семей қаласынан басталды.
Елбасы Нұрсұлтан Әбішұлы «Ұлы даланың жеті қыры» атты мақаласында: «Біздің мәдениетіміздің негізгі сюжеттерінде, кейіпкерлері мен сарындарында шекара болмайды, сол себепті оны жүйелі зерттеп, бүкіл Орталық Еуразия кеңістігі мен барша әлемде дәріптеуге тиіспіз»,- деген еді. «Ұлы даланың көне сарындары» атты музыка фестивалі де сол киелі жеріміздің тарихы мен тағдырын кестелі тілмен, әдемі әуенмен кейінгі ұрпаққа насихаттауды мақсат етеді.
Еліміздің жетекші партиясы «Нұр Отанның» 20 жылдығына орай қолға алынған шараға партияның Орталық аппаратының хатшысы Қаныбек Жұмашев пен қала әкімі Ермак Сәлімов арнайы келіп қатысты.
— Құрметті семейліктер, қадірлі ағайын. Бүгін біздің сіздермен кездесуімізге Елбасының «Ұлы даланың жеті қыры» атты мақаласы арқау болып отыр. Мақала жарық көргелі жүрегі «қазақ» деп соғатын азаматтардың рухы көтеріліп, өнер майталмандарының көңіліне шабыт бітті.
Осы мақала аясында ел көлемінде түрлі жобалар қолға алына бастағанын білетін боларсыздар. «Нұр Отан» партиясы да осы шаралар легіне өз үлесін қосу мақсатында республика деңгейінде «Ұлы даланың көне сарындары» атты дәстүрлі музыка фестивалін өткізу жөнінде шешім қабылдады. Фестиваль кең-байтақ жеріміздің әр өңіріндегі ән-күй өнерінің ерекшеліктерін халыққа паш етіп, жастар бойына ұлттық өнерді сіңіруді мақсат тұтады. Он бес облысты аралай жүріп, ұлттық өнерімізді насихаттамақпыз. Фестивальды алаштың астанасы, ұлы Абай, Шәкәрім, Мұхтар туған Семей қаласынан бастауымыздың да өзіндік мәні бар. Бұл біздің осы киелі топыраққа бас игеніміз деп түсінерсіздер,- деді Қаныбек Бекболатұлы фестивальдың ашылу салтанатында сөйлеген сөзінде.
— Ардақты ағайын, қадірменді жерлестер! «Ұлы даланың көне сарындары» атты фестивальдың Семей жерінен бастау алып жатқанына ерекше қуаныштымыз. Себебі Семей – Абайдың елі. Абайдың елі – руханият меккесі, ұлттық өнердің киелі бесігі. Елбасымыз қазақ даласының тарихы мен руханиятына баса назар аударып, әр кез қолдап келеді. Бұған дәлел – «Рухани жаңғыру» және «Ұлы даланың жеті қыры» мақалалары. Біз өз тарихымызбен мақтанып, жасампаздықты сақтауымыз қажет. Ардақты ағайын, бүгінгі дәстүрлі музыка кеші «Нұр Отан» партиясының бастамасымен өтіп жатыр. «Нұр Отан» – қиындықтар мен сынақтарды халықпен бірге бөлісіп, күрделі әрі өмірлік маңызы бар шешімдер қабылдап, олардың орындалуына қол жеткізіп келеді. Баршаңызды партияның құрылғанына 20 жыл толуымен құттықтаймын! Бүгін Ұлы даланың дәстүрлі әуенімен сусындап, рухани азық алып қайтатынымызға сенімдімін. Байтақ жеріміз, бағаналы ордамыз аман, еліміз еңселі болсын,- деді қала әкімі Ермак Сәлімов.
Бабаларымыздан қалған асыл өнерді ұлықтауды мұрат еткен шараға Арқа, Алтай, Жетісу, Қаратау, Сыр және батыс мектептерінің көрнекті өкілдері — Ерлан Рысқали, Шолпан Дәржанова, Алмас Алматов, Жәкен Омаров, Гүлмира Сарина, Батыржан Мықтыбаев, Гүлдана Ноғайбаева, Әділ Тұрғанбаев, Берік Омаров, Рахат Тыныбаева, Естай Матабаев, Алтын Сымасейітова, Әділет Серіков өнер көрсетіп, қалың көпшіліктің ыстық ықыласына ие болды.
Фестиваль жыл ортасында Жетісу өңірінде қорытындыланады.
Айтолқын САМАТ, «Семей таңы»{jcomments off}
