{jcomments off}Қалалық әкімдікте жергілікті атқарушы билік өкілдері жер телімі кезегінде тұрған тұрғындармен кездесу өткізіп, жер телімін беру тәртібі мен жеке тұрғын үй құрылысы туралы жан-жақты түсіндірді.
Қазіргі уақытта елімізде халықты қолжетімді баспанамен қамтамасыз етуге және жеке тұрғын үй салуға арналған мемлекеттік бағдарламалар іске асырылуда. Сонымен қатар ҚР-ның әр азаматының жер заңнамасымен регламенттелген жеке тұрғын үй құрылысына әкімдікпен инженерлік инфрақұрылым тартылған 10 сотық жерді тегін алуға құқығы бар. 10 сотық жер алу үшін әкімдікке өтініш беру керек, яғни жер теліміне кезекте тұруы қажет.
Алайда Семей қаласында заңнамада көрсетілген талаптар бойынша жер беру үшін тұрғын үй салынатын аудан сумен, жарықпен толықтай қамтылуы тиіс болғандықтан, жер телімдерін беру уақытша тоқтатылған болатын. Осыған байланысты қала әкімі Ермак Сәлімов шаһардағы Ақсай, Ұшақтар, Комсомол кенттерінің инфрақұрылымын дамыту жұмыстарын қолға алып отыр.
— Бұл кенттерде өткен жылдан бастап сумен қамту жұмыстарын жүргізіп жатырмыз. Биылғы жылы электр жарығын тартуды бітіргеннен кейін, жерді кезектегі тізім бойынша бере бастаймыз. Кезекте тұрғандарға жер телімі қаламыздағы Ақсай, Комсомол, Ұшақтар кенттерінен берілетін болады,- деді қала әкімі Е.Сәлімов.
Атамыш аудандардағы жер телімдері «Нұрлы жер» бағдарламасы арқылы беріледі. Бағдарлама аясында тұрғын үй салу үшін қаламызда 10-нан аса аудан белгіленген. Бірінші кезеңде, яғни 2021 жылға дейін, Ақсай, Комсомол, Ұшақтар кенттерінен жер телімдері берілетін болады. Шаһарымызда жер телімін алуға 24 472 адам кезекте тұр. Бұл кезектің тізімін Семей қаласы әкімінің ресми сайты мен қалалық прокоратураның сайтынан көруге болады.
— 2016 жылдан бастап Жер кодексіне өзгеріс енгізіліп, жер бірінші кезекте үш жылға беріледі деп көрсетілген. Яғни, жер теліміне қол жеткізген азамат үш жылдың ішінде тұрғын үй салуға міндетті. Егер үш жыл ішінде құрылыс салынбайтын болса, Үкімет өзіне қайтарып алатын болады,- дейді қалалық жер қатынастары бөлімінің басшысы Құдайберген Сейілханов.
Айта кетерлігі, жеке тұрғын үйлер жергілікті атқарушы органдар тарапынан әзірленген үйлердің типтік жобалары негізінде салынуы тиіс. Яғни үйдің жобасын жасауда, құрылыс материалдарын және олардың түсін таңдауда бірыңғай архитектуралық стандарт талаптары сақталуы керек.
— Біз жер телімін алуға рұқсаттары бар тұрғындарға құрылыс жобаларын тегін жасаймыз. Жоба жасаудың негізгі талаптары бар. Жобалардың құрылыс материалдары, аумағы, орналасуы бойынша бір-бірінен айырмашылықтары бар. Әрбір учаскеге бас жоспар беріледі. Мұның бәрі екі жақты келісіммен жасалынатын болады. Жеке тұрғын үй салушылар өздері қалаған жоба мен стандартты таңдай алады,- деді қалалық архитектура бөлімінің басшысы Бақтияр Сәлімов.
«Нұрлы жер» бағдарламасы бойынша жеке тұрғын үйлердің құрылысын үш құрылыс компаниясы жүргізеді. Бұл компаниялар тұрғын үйдің 1 шаршы метрін 105 мыңнан 120 мың теңгеге дейін бағалап отыр.
Жиын барысында құрылыс компанияларының өкілдері баспаналардың ерекшеліктеріне тоқталып, құрылыс салу тәртібін түсіндірді.
— Салынатын үйдің қабырғасының қалындығы 55 см болады, яғни жылу сақталады. Шатыры боялған шифермен жабылады. Еуропалық үйлердің үлгісінен кем түспейді. Біз сіздерге өз жобамызды ұсынамыз,- деді құрылыс компаниясының өкілі Асхат Мейірманов.
Жиын соңында тұрғындар бөлім басшыларына тұрғын үй салуға қатысты көкейінде жүрген сұрақтарын қойып, тиісті жауаптар алды.
Құралай ҚАЙЫРЖАНҚЫЗЫ, «Семей таңы»
