Қаламыздағы Абай кітапханасында ҚР Білім және ғылым министрлігінің бастамасымен «Жас project» жобасы семинар-тренингісінің төртінші кезеңі өтуде. Елбасы Н.Назарбаев «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында жастарды қолдауға бағытталған жобаларға басымдық беру қажеттігін ерекше атап өткен болатын. Соның бірі «Жас project» жобасы биыл екінші жыл қатарынан жүзеге асырылып келеді.
Жоба жастарға өз кәсіби және көшбасшылық дағдыларын жетілдіруге, халыққа пайдалы әлеуметтік жобаларын жүзеге асыруға мүмкіндік береді. Еуропалық қайта құру және даму банкі жеңімпаздарға қаржылай демеушілік жасап, кәсіп ашу үшін 1 млн. теңге көлемінде қайтарымсыз грант негізінде қаржы бөледі. Жоба төрт кезеңнен тұрады. Бүгінде оның төртінші кезеңі өтуде. Бағдарламаға, Семей қаласымен қатар, Бесқарағай, Бородулиха, Үржар аудандарының 14 — 29 жас аралығындағы жастары қатысуда.
— Семей қаласы бойынша өткен жылы 67 жоба ұсынылып, соның ішінде 20 жоба жеңіске жетті. Әрқайсысы 1 млн. теңге қайтарымсыз грантқа ие болды. Олар әлеуметтік, білім беру, медициналық жәрдем, волонтерлік көмек сынды бағыттарды қамтыды. Сонымен бірге олар 6 ай мерзімде шәкіртақы алады. Шәкіртақының көлемі жоғары оқу орнын бітіргендерге 60 мың теңге болса, орта оқу орнын немесе мектеп бітірген жастарға 40 мың теңге,- деді Жастар ресурстық орталығының басшысы Олжас Соғымбай.
Бұрын ешқашан бизнес-жоба дайындап көрмеген жастардың жоспарын нақтылап, бизнес әлемге бағыттауда ментор мамандардың жұмысы маңызды. Биылғы жобаның төртінші кезеңі төрт күн ұйымдастырылып, 29 қаңтар күні өтетін форумда қорытындыланатын болады.
Қ.ОМАШ, {jcomments off}«Семей таңы»
