Сенбі, 26 қаңтар күні Шәкәрім атындағы мемлекеттік университеттің бас ғимаратында «АКМЕ» халықаралық ағартушылық клубының ұйымдастырумен «Жастар жылы: келешекке қадам» атты ашық пікір алаңы өтті. Шараға университет ректоры Мейір Ескендіров, «АКМЕ» клубының басшысы Арай Жундибаева, Жастар ресурстық орталығының басшысы Олжас Соғымбай, университет оқытушылары мен қаламыздағы жоғары оқу орындары, колледж студенттері қатысты.
Ашық пікір алаңында алғашқы болып сөз алған университет ректоры Мейір Ғариполлаұы Елбасы Н.Назарбаевтың 2019 жылды Жастар жылы деп жариялауы арқылы жастарға үлкен сенім артып отырғанын айтып өтті.
— Ғылымның қарыштап дамыған заманында Қазақстан жастары жан-жақты болуы керек. Үш тілді меңгерген, білімді, кітап ақтарып, тарихи дүниемізді тармақтай білген жастарға ел ертеңін сенімді түрде тапсыруға болады,- дей келе,- «жас» деген сөзді қалай түсінесіздер?- деп ортаға сауал тастап, жалынды жастарымыздың пікірін тыңдады.
Жиында Елбасының Жастар жылының ресми ашылуында сөйлеген сөзінен үзінділер беріліп, студенттер өзара ашық пікір алмасты. Университет ректоры Мейір Ғариполлаұы Елбасының тапсырмаларын жастармен бірге талқылап, олардың тарапынан жақсы ұсыныстар түсіп жатса, әрқашан қолдауға дайын екендігін жеткізді.
Жиында сөз алған Жастар ресурстық орталығының басшысы Олжас Соғымбай жастарды қолдап отырған Шәкәрім шаңырағына алғысын білдіріп, халықаралық еркін пікір алмасу алаңын өткізу жөнінде ұсыныс жасады.
— Шәкәрім университеті шет мемлекеттердің жоғары оқу орындарымен тығыз қарым-қатынас орнатып, тәжірибе алмасып отыр. Биылғы жастар жылын пайдалана отырып, «АКМЕ» халықаралық клубының қатысуымен «Жастар бейбітшілікті қолдайды» атты халықаралық еркін пікір алмасу алаңын өткізуді ұсынамын. Өзге мемлекеттерге білім алуға барған қандастарымыз «Қазақстаннанмын, Семейденмін» десе, шетелдіктер бірінші атомның зардабы туралы айтады екен. Сондықтан халқымыздың бейбіт өмірін, береке-бірлігін, еліміздің тамаша табиғатын шетелдіктерге кеңінен таныстыру керек деп ойлаймын,- деді О.Соғымбай.
Жиынды қорытындылаған Мейір Ғариполлаұлы озық ойлы жастар тарапынан тың жобалар ұсынылып жатса, алдағы уақыттарда студенттермен онлайн байланыста пікір алмасу ұйымдастырылатынын жеткізіп, жастарға толағай табыстар тіледі.
Нұрзат ҒАЛБИЯТ,
Шәкәрім атындағы мемлекеттік университеттің журналистика
кафедрасының 2-ші курс студенті.{jcomments off}
