Сенбі, 26 қаңтар күні шаһар басшысы Ермак Сәлімов қаламыздағы Аналар үйіне барып, жас және жалғыз басты аналардың тұрмыс жағдайларымен танысты. Кездесу барысында Ермак Бидахметұлы 1 жасқа толған Асылхан есімді бүлдіршіннің тұсауын кесіп, халқының ұлы болсын деп батасын берді.
«Ана үйі» қоғамдық қоры өмірдің қысылтаяң кезеңіне тап болған жас және жалғыз басты аналарға көмектесу мақсатында төрт жыл{jcomments off} бұрын ашылған. Осы уақыт аралығында қоғамдық қор қаламыздағы 135 жалғыз басты ананы бауырына басып, көмек қолын созған. Қазіргі таңда орталық 11 ананың уақытша мекеніне айналып отыр. Оның 5-еуі — студент. Ал еліміз бойынша 19 қалада жиырма бес Аналар үйі орналасқан.
— Бүгін Асылханның туған күні. Ол 1 жасқа толды. Қазақ халқының дәстүрі бойынша кішкентайымыздың тұсауын кесу рәсімін өткізіп жатырмыз. Қала әкімі Ермак Бидахметұлының біздің өтінішімізді құп алып, осында келгеніне қуаныштымыз. Асылханның анасы бізге 9 сынып оқып жүрген кезінде келді. Бір жылдың ішінде мектеп бітіріп, колледжге оқуға түсті. Аналарға психологиялық және материалдық қолдау көрсететін орталықтың бар екенін білсе, тастанды балалар мен түсік жасатуға баратын қыздардың саны азаяр еді,- деді «Ана үйі» қоғамдық қорының үйлестірушісі Айнагүл Нұртазина.
Айнагүл Нұртазинаның айтуынша, жас аналар мұнда бір жарым жыл бойы тегін тұра алады. Ана үйінде аналар мен балаларға қажеттінің бәрі — ойыншықтан бастап кір жуғыш машина, тоңазытқыш, теледидар секілді тұрмыстық жабдықтар бар. Сонымен бірге тегін балабақшамен қамтылған, медицина-лық, психологиялық көмек көрсетіледі. Қоғамдық қор аналардың білім алып, кәсіп игеруіне, отбасымен татуласуына қолдау білдіреді.
Құралай ДІНЖҰМАНОВА, «Семей таңы»
