{jcomments off}
Өткен жылы Елбасы Н.Назарбаевтың «Рухни жаңғыру» бағдарламасы аясында ШҚО әкімі Даниал Ахметовтің бастамасымен «Абай әлемі» кітаптар топтамасын шығару ісі қолға алынған болатын. Негізгі мақсат — шығыс өңірінің ақын-жазушыларының, жас таланттардың шығармаларын баспадан шығарып, көркем шығарма арқылы жастардың ой-өрісін рухани тұрғыда дамыту. Осы бастама арқылы он қаламгердің туындылары жинақталған 16 том кітап жарық көріп, оқырмандарына жол тартты.
— Таяуда ғана баспадан шыққан белгілі тұлғалардың шығармаларын оқырмандар назарына ұсыну үшін кітаптар көрмесін ұйымдастырып отырмыз. Кітаптар топтамасын жастарға насихаттау бағытында бірнеше көрмелер өткізілді. Абай кітапханасында ұйымдастырылатын көрмелердің мақсаты – кітаптар топтамасын жастарға таныстыру, насихаттау. Бүгінде кітапханаға келушілер саны көбейе түсті, бұл жастардың көркем шығармаға деген қызығушылығының артқанын көрсетеді, — дейді Абай кітапханасы директорының орынбасары Гүлмира Аязбаева.
Аталмыш көрмеде жуырда жарық көрген Абай Құнанбаев, Шәкәрім Құдайбердіұлы, Мұхтар Әуезовтің және кезінде аз таралыммен баспадан шыққан Төлеу Көбдікұлының туындылары оқырмандар назарына ұсынылды. Сонымен қатар Медеу Сәрсеке, Анатолий Иванов, Борис Щербаков сынды жазушылардың да романдары осы көрмеден орын алған.
Құралай ҚАЙЫРЖАНҚЫЗЫ, «Семей таңы»
