Сейсенбі, 29 қаңтар күні қаламыздағы Абай кітапханасында «Zhas Project» жастар корпусын дамыту жобасының «Арманда! Ұсын! Іске асыр!» атты аймақтық қорытынды форумы өтті. Форумда жастар жоба аясында дайындаған өнімдерін келушілер назарына ұсынды. Шараға қала әкімінің орынбасары Надежда Шарова, қалалық ішкі саясат бөлімінің басшысы Нұржан Есенжолов, «Атамекен» ұлттық кәсіпкерлер палатасы, «Даму» кәсіпкерлікті дамыту қоры өкілдері мен өңір жастары қатысты.
ҚР Білім және ғылым министрлігі Еуропалық қайта құру және даму банкімен бірлесіп «Zhas Project» жобасын 2017 жылдан бастап қолға алған болатын. Ауқымды жоба жұмыссыз және табысы аз жастардың бастамаларына қаржылай көмек көрсетіп, шағын және орта бизнесті дамыту мақсатында құрылған. Биыл Шығыс Қаза{jcomments off}қстан облысынан іріктеліп алынған 149 жоба алты ай бойы жүзеге асырылды. Қатысушылардың 55 пайызы ауыл жастары болса, 67 пайызы — әлеуметтік осал топтардың қатарына кіретіндер.
— Жобаға Шығыс Қазақстан облысы бойынша 473 өтінім берілді. Әр жоба үш кезеңдік іріктеуден өтіп, оның 149-ы жеңімпаз атанды. Бүгінгі күні 491 адам ай сайын мыңдаған шығысқазақстандықтарға тегін қызмет көрсетіп келді. Барлық жобаға қатысушыларды екі кезеңмен төрт күндік оқытудан өткіздік. Біз оларға өмірлік маңызы бар дағдыларды үйреттік. Атап айтсақ, келіссөзді жүргізуді және оларды жоспарлауды үйретіп, қаржыландыру көздерін іздестіру жолдарын көрсеттік, сонымен қатар кеңестер берілді. Бүгінгі форумға «Атамекен» ұлттық кәсіпкерлерді қолдау палатасы мен «Даму» кәсіпкерлікті дамыту қорынан өкілдер шақырдық. Мүмкін, олар жобаға қатысушы жастарға қолдау білдіретін шығар,- деді «Zhas Project» жобасының ШҚО бойынша үйлестірушісі Серік Жүнісов.
Семей қаласы бойынша өткен жылы 67 жоба ұсынылып, соның ішінде 20 жоба жеңіске жеткен болатын. Әрқайсысы Еуропалық қайта құру және даму банкінің демеушілігімен 1 млн. теңге қайтарымсыз грантқа ие болды. Бұл қаражатқа жоба қатысушылары қажетті құрал-жабдықтарын сатып алып, ай сайын әлеуметтік жағынан аз қамтылған және көп балалы отбасыларға, мүмкіндігі шектеулі жандар мен зейнеткерлерге тегін қызмет көрсетті. Жобалар әлеуметтік, білім беру, медициналық жәрдем, волонтерлік көмек сынды бағыттарды қамтиды.
Форум барысында арнайы көрме ұйымдастырылып, жастар өз өнімдерін таныстыруға мүмкіндік алды. Кейбір қатысушылар қонақтарға табиғи сүт өнімдерін ұсынса, енді біреулері өздерінің кәдесыйлық бұйымдарымен көпшіліктің назарын аударды.
Жоба жеңімпаздарының бірі Мұхит Шуақбаев жас аналардың бүлдіршіндеріне массаж жасап үйрететін «Аналарға көмек» жобасын ұсынған. Бүгінде елімізде балалардың арасында дисплазия, мойын қисаюы, майтабан сынды ауру түрлері жиі кездеседі. Сондықтан ол аналардың сәбилеріне массаж жасап үйренуі маңызды деп санайды.
— Жоба аясында біз қаламыздағы 60 анаға массаж жасаудың әдіс-тәсілдерін үйреттік. Қатысушыларға массаж жасау курсынан өткенін растайтын сертификат берілді. Бұл массаждар тек науқас бүлдіршіндерге ғана емес, сонымен бірге осындай аурулардың алдын алу үшін де жасалады. Сондай-ақ аналар өз балаларына ғана емес, таныстарына, туыстарына да көмек қолын соза алады. Бұл жобаны қолға алғандағы мақсатымыз — денсаулығы мықты ұрпақ қалыптастыруға септігімізді тигізу,- деді «Аналарға көмек» жобасының жетекшісі Мұхит Шуақбаев.
Форумда жастардың жобасымен танысып шыққан қала әкімінің орынбасары Надежда Шарова жұмыстарға оң бағасын беріп, бүгінгі қатысушылардың болашақта жақсы кәсіпкер болуға мүмкіндіктері жоғары екенін атап өтті.
Ұйымдастырушылардың айтуынша, алдағы уақытта өтетін республикалық форумға облысымыздан бірқатар жоба ұсынылатын болады.
Құралай ҚАЙЫРЖАНҚЫЗЫ, «Семей таңы»
