Бейсенбі, 31 қаңтар күні Абайдың «Жидебай-Бөрілі» мемлекеттік қорық-музейінде «Ақылдастар» ауыл ардагерлері қоғамдық бірлестігінің төрағасы Сағындық Бекқалиұлы Бейсенбаевтың авторлығымен жарық көрген «Өнегелі өмір өрнектері» атты кітаптың тұсаукесері өтті. Рәсімге қалалық ардагерлер кеңесінің төрағасы Амантай Доғалақов, өлкетанушы Молдабек Жанболатов, журналист, өлкетанушы, хакім Абайдың жиені Балтабек Ерсәлімов, тарихшы Амантай Исин және өзге де ардагер ақсақалдар, студенттер қатысты.
Оқырманға жол тартқан жаңа жинақта аймағымыздағы абыз ақсақалдардың өнегелі өмір жолдары, «Ақылдастар» қоғамдық бірлестігінің білім беру мекемелерімен, жергілікті атқарушы билікпен бірлесе отырып рухани құндылықтарымызды насихаттау бағытында өткізген шаралары қарапайым тілмен баяндалып, БАҚ-та жарияланған мәліметтермен толықтырылған. Сонымен қатар Алаш қайраткерлері мен «Алаш» партиясының саяси іс-әрекеті туралы айтылмай келген жасырын мәліметтер семейлік тарихшы ғалымдардың зерттеу еңбектерінде, мұрағат деректерінде жан-жақты баяндалады.
«Басты мақсат — қоғам өміріне араласу», «Батыр бабалар даңқы ғасырларға жалғасады», «Алаш арыстары. Саяси қуғын-сүргін. Ашаршылық», «Еңбегімен елеулі қариялар», «Мерей жас иелерін құттықтау», «Еске алу», «Ақ тілек және әзіл-қалжың» атты жеті бөлімнен тұратын жинақ 100 данамен басылып шығыпты.
«Қазақ әдеби процесінде деректі проза жанры бүкіл қазақ елі бойынша өзінің екінші тынысын алып жатыр. Бұл әдеби үрдістен қолына қалам ұстаған шежірелі шығыстың қазыналы қарттары да тыс қалып отырған жоқ. Оған қолдарыңызға тиіп отырған Сағындық Бейсенбаевтың киелі Семей өңірінде шығып отырған «Өнегелі өмір өрнектері» туындысы куә», — деп жазады кітаптың алғы сөзінде Қазақстан Жазушылар одағының Семей филиалының төрағасы Мерей Қартов.
Кітап авторы қолындағы материалдарын бір жүйеге түсіріп, әр бөлімді басты бір арнаға тоғыстыра білген.
— Кеңес өкіметі құлаған 1990 жылдар еліміз үшін өте ауыр кезең болды. Сол жылдары ауылдан Семей қаласына көшіп келген ардагер қариялар қоғамдық өмірден мүлде ажырап қалды. Қала тіршілігіне көндігу де оңай болған жоқ. Олар кезінде аудан, ауылдарда қайнаған еңбектің ортасында болып, ел игілігі үшін аянбай тер төккен, оқыған, білімді басшы, әртүрлі мамандық иелері, аудан, ауылдардың бас көтерер құрметті азаматтары еді. Осы ардагерлердің бастамасымен құрылған «Ақылдастар» ауыл ардагерлері қоғамдық ұйымының басты мақсаты қалаға көшіп келіп, елеусіз — ескерусіз қалған қариялардың қоғам өміріне араласуына мүмкіндік жасап, олардың әлеуметтік жағдайына көңіл бөлу болды. Бұл мақсатымыз орындалды. Қала әкімшілігінің ішкі саясат бөлімімен тығыз қарым-қатынас жасап, шаһарымызда күн құрғатпай өтіп жататын саяси-әлеуметтік, мәдени шараларға қатысатын болдық. Қала әкімінің, облыс әкімінің есебіне қатысып, өз ой-пікірімізді айта алатын болдық, — дейді «Ақылдастар» ауыл ардагерлері қоғамдық бірлестігінің төрағасы Сағындық Бекқалиұлы.
Айта кетейік, халқымыздың ұлттық рухани құндылықтарын сақтау және насихаттау мақсатында 2008 жылы құрылған «Ақылдастар» қоғамдық бірлестігі өңірдің 13 ауданынан келген 120-ға жуық ардагердің басын қосып отыр.
{jcomments off}
Айтолқын САМАТ, «Семей таңы»
