Сәрсенбі, 30 қаңтар күні қалалық әкімдікте ардагерлер кеңесінің кеңейтілген отырысы өтті. Жиынға қала әкімінің орынбасары Надежда Шарова, ішкі саясат бөлімінің басшысы Нұржан Есенжолов, ардагерлер ұйымдарының төрағалары мен өкілдері қатысты.
Күн тәртібінде Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауын талдау, қалалық ардагерлер кеңесінің биылғы жұмыс жоспарын бекіту және Отан соғысы ардагерлері мен тыл еңбеккерлерінің ерліктерін мәңгі есте қалдыру жолындағы «Ет комбинаты» ЖШС ардагерлерінің жұмыс тәжірибесін үлгі ету, сондай-ақ зейнеткерлердің әлеуметтік жағдайларына қатысты мәселелер қаралды.
Басқосуда қала әкімінің орынбасары Надежда Шарова Елбасы Н.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты халыққа Жолдауындағы негізгі бағыттарды атап өтіп, міндеттер мен тапсырмаларға кеңірек тоқталды.
Биыл зейнетақы мөлшері 7 пайызға, базалық зейнетақы 5 пайызға өскен болатын. «Зейнетақы төлеу жөніндегі мемлекеттік орталығы» РҚМК ШҚО филиалының Семей қалалық № 2 бөлімшесінің басшысы Дархан Өтегеновтің айтуынша, биыл Семей қаласында зейнетақының ең төменгі мөлшері 36 мың теңге, ең төменгі базалық зейнетақының мөлшері 16 мың теңге болса, ең жоғары зейнетақы мөлшері 116 мың теңгені құрайды.
Ардагерлер кеңесінің мүшелері Семей ядролық сынақ полигонының әсерінен зардап шеккендерге қосымша төлем жасалатыны туралы ақпараттар тарағанын айтып, сұрақтар қойды. Бұл маңызды сұраққа қала әкімінің орынбасары Надежда Шарова жауап берді.
— Әлеуметтік желілерде Семей ядролық сынақ полигонынан зардап шеккендерге қосымша төлем жасалады, жеңілдік билеттері болады, полигондық куәлікті қайта рәсімдеу керек деген сияқты хабарламаларды жиі көреміз. Бұл мәселе туралы жақында Еңбек және халықты әлеуметтік қорғау министрлігі ресми мәлімдеме жасады. Қазақстанда «Семей ядролық сынақ полигонындағы ядролық сынақтардың салдарынан зардап шеккен азаматтарды әлеуметтік қорғау туралы» Заң бар. Оған ешқандай өзгерістер енгізілген жоқ. Қаламыздағы қоғам белсенділері осы заңды жетілдіруге қатысты бірқатар ұсыныстар әзірлеген болатын. Жақында өткен Парламент отырысында біздің аймағымыздан барған өкіл Жанна Жибраева осы ұсыныстарды жеткізді. Бүгінде заңнамаға өзгерістер енгізуге байланысты барлық ұсыныстар қаралып жатыр, — деді қала әкімінің орынбасары Надежда Шарова.
Өткен жылы қаламыздағы «Қарағайлы» шипажайы қайта жөндеуден өтіп, пайдалануға берілді. Бүгінде мұнда мүмкіндігі шектеулі жандар ем қабылдауда. Жақын арада шипажай зейнеткерлерге де есігін айқара ашпақ.
— Өткен жылдың күзінде қаламыздағы «Қарағайлы» шипажайы пайдалануға берілген болатын. Орталық жаңа құрал-жабдықтармен жабдықталған, емделушілерге білікті мамандар қызмет көрсетеді. Алдағы уақытта зейнеткерлер де шипажайда демалып, емделуге мүмкіндік алатын болады. Ал қазіргі күні бұл орында мүмкіндігі шектеулі жандар ғана қабылданады,- деді Семей қаласының жұмыспен қамту, әлеуметтік бағдарламалар және азаматтық хал актілерін тіркеу бөлімінің сектор меңгерушісі Айдар Самаев.
Құралай ҚАЙЫРЖАНҚЫЗЫ, «Семей таңы»{jcomments off}
