Семей қаласының әкімі Ермак Сәлімов Знаменка, Айнабұлақ, Ақбұлақ, Алғабас, Қараөлең, Абыралы ауылдық округтерінде халықпен кездесіп, 2018 жылы атқарылған жұмыстар туралы есеп беріп, осы жылғы жоспарлармен бөлісті.
— Былтырғы жылдың қорытындысы бойынша, мал басының саны артты. Оның ішінде ірі қара мал — 7,8%-ға, ұсақ мал – 2,9 %-ға, жылқы саны 12,1%-ға артты. 2018 жылы 1 миллиард 7 миллион теңге субсидия төленді. Оның ішінде 821 миллион теңге мал шаруашылығы, 186 миллион теңге өсімдік шаруашылығы саласына бөлінді. «Сыбаға» бағдарламасы бойынша 256 бас ірі қара және 519 бас аналық ұсақ мал сатылып алынды. Біз ауыл шаруашылығын дамыту бойынша жұмыстарды осы жылы да жалғастырамыз. Былтырғы жылы Қайнар ауылдық Мәдениет үйін жөндеуге 20 миллион 856 мың теңге бөлініп, толықтай игерілді. Алғабас ауылындағы әкімдік ғимаратын күрделі жөндеуден өткізу үшін 39 миллион теңге қаржы бөлініп, жұмыстар аяқталды. Бүгінде екі қабатты ғимаратта ауыл әкімдігі, клуб және басқа да бюджеттік мекемелер халыққа қызмет көрсетуде,- деді қала әкімі Ермак Сәлімов тұрғындар алдындағы есебінде.
2018 жылы ауылдағы мектептерді жөндеуге 52 миллион 556 мың теңге бөлінген. Знаменка, Айнабұлақ, Приречный, Жарқын, Шақаман, Ақбұлақ, Алғабас, Абыралы, Бөкенші клубтарына және Қайнар Мәдениет үйіне 2 миллион 700 мың теңге қаражатқа сахналық киім мен музыкалық аппаратура алынды.
Биыл Жарқын, Новобаженово, Қайнар, Түріксіб ауылдарының мектептері жөнделеді. Бұл жұмысқа 11 миллион 700 мың теңге қаржы қарастырылған.
Осы жылы өңірдегі барлық шағын мектептерде IT-сыныптар ашу жоспарланып отыр. Оған 92 миллион теңге қаржы бөлінді.
2019 жылы Қайнар ауылындағы кітапханаға кітап сатып алуға қаржы қарастырылды. Бөкенші ауылдық клубына аппаратура алу жоспарда бар.
Қайнар аулындағы қоғамдық монша жөнделіп, халық игілігіне берілді. Ауылда көп жылдар бойы шешілмеген ауыз су мәселесі өткен жылы шешімін тауып, халық таза ауыз сумен қамтылды.
— Облыс әкімінің қолдауымен Семей өңірі дамып келеді, оны біз басылымдардан оқып, біліп отырамыз. Қарағайлы ықшам ауданында көп қабатты үйлер салынуда, жолдар жөнделуде. Мектептерде ІТ-сыныптар ашылып, роботехника дамуда. Дәрігерлер шетелдерде тәжірибе жинақтап, медицина саласына соңғы үлгідегі қондырғылар алынып жатыр. Ауыл мектептері де жөнделіп, балалардың сапалы білім алуына жағдай жасалуда. Ауылымызда мал саны артып, халықтың тұрмысы жақсарып келеді. Семей өңіріне қолдау көрсетіп келе жатқан облыс басшысы Даниал Ахметовке алғыс айтамыз,- деді кездесуде сөз алған Алғабас ауылының тұрғыны Мейрам Табелдин.
Ауылдарда өткен есептік кездесулерде тұрғындар өз ойларын ортаға салып, атқарылған жұмыстарға оң бағасын берді. Алдағы жоспарлар талқыланып, жауапты бөлімдерге нақты тапсырмалар жүктелді.
Қала әкімінің баспасөз қызметі.{jcomments off}
