Сенбі, 16 ақпан күні шаһар басшысы Ермак Сәлімов қала әкімінің есеп беру жиынында ұсыныстарын айтқан тұрғындармен кездесіп, сауалдарына жауап берді.
— Өздеріңіз білетіндей, есеп беру кездесуінде уақыт шектеулі және толық жауап беруге мүмкіндік бола бермейді,- деп атап өтті Ермак Бидахметұлы.
Кездесуге 20-ға жуық тұрғын шақырылып, жеке сұрақтары талқыланды. Бобровка кентінің тұрғыны Манап Тоқтарұлы аталған кенттегі су мәселесін шешіп беруді өтінді. Құдық суының сапасыздығын айтып, орталықтандырылған сушүмек (колонка) орнатылса деген тілегін жеткізді.
— Еріген қар суы аулаларға кіріп кетеді. Кентте қар шығару жұмыстары жолға қойылса екен. Жол жөндеуге де көңіл бөлсеңіздер,- деді тұрғын.
Ал Аққу ауданында спорт алаңын орнатуды сұраған Аянғали Нұрахметовке қала әкімі мәселе осы жылы шешілетінін айтты. Бұл аудандағы балалар үшін жаз шыға Workout алаңдары салынбақ.
Кездесуде сөз алған Нина Гладышева да өз сұрағына толық жауап алды. Зейнеткер есеп беру кездесуінде бұрынғы Семей ядролық сынақ полигонынан зардап шеккен тұрғындар үшін оңалту орталығын ашу туралы сөз қозғаған болатын. Орталықтың қажеттілігі туралы зейнеткердің ойымен келіскен Ермак Бидахметұлы бұл мәселені біртіндеп шешуді ұсынды. Ең алдымен қалалық бюджет есебінен жобалық-сметалық құжаттама жасалатын болады.
«Шығыс» кентінің сол жақ саяжай тұрғыны Үміт Қалиева кентке су құбыры тартылып, жол жөнделсе, мектеп пен балабақша салынса деген кент тұрғындарының өтінішін жеткізді.
— Шығыс кентінің сол жақ саяжайында тұратын 1117 отбасы электр энергиясын 3 трансформатор арқылы алып отыр. Тоқ күші жетіспегендіктен, жарық жиі өшіп қалады. Электр энергиясы «Шығысэнерготрейд» ЖШС мекемесі арқылы берілсе деген өтініш айтамыз. Ауыз суды тұрғындар өздері қазған құдықтан алып ішуде. Судың сапасы нашар болғандықтан, өзге саяжайлардан су тасуға мәжбүрміз. Сондықтан саяжайға орталықтандырылған колонка орнатып берсеңіздер. Оқушылар мектепке баратын жолға тым болмағанда құм себіліп, грейдермен тазартылса,- деді Ү.Қалиева.
Жиын барысында кент тұрғындарының 80 пайыздан астамы қоқысты шығару бойынша келісімшартқа отырмағаны белгілі болды. Е.Сәлімов әр мәселенің жеке талқыланатынын, жақын арада кент тұрғындарымен кездесу өткізетінін жеткізді.
Семей қалалық Қоғамдық кеңесінің мүшесі, қоғам белсендісі Николай Исаев қала әкімінің есеп беру кездесуінде орталық автовокзалдың жер учаскесін жеке тұлғаға сатудың заңды еместігін айтып, мәселені қайта қарауды ұсынған болатын. Бұл сұраққа қалалық жер қатынастары бөлімі басшысының орынбасары Дамир Рахымжанов жауап берді. Оның айтуынша, істі қайта қарау үшін қалалық сотқа арыз беріледі.
— Заңға сәйкес, жер жалға ғана беріледі. Ал Уәлиханов көшесі ортақ пайдалануға жатады. Жуырда өтетін қалалық мәслихат сессиясында жер комиссиясының құрамы қайта құрылады. Біз комиссия құрамына Николай Исаевты да ұсынамыз. Мәселені бірге қарайтын боламыз,- деді Дамир Рахымжанов.
Дүйсен Ибраев атты тұрғын Затон ауданындағы 1 микрорайон тұрғындарының жылу мен суық суы тұрғын үй-коммуналдық шаруашылық мекемесінің қарауына, электр желілері ШҚ АЭК құзыретіне алынуын сұраған болатын. Тұрғынның айтуынша, электр мен жылу желілері қазір иесіз тұр. Ермак Бидахметұлы аталған мәселелердің шешімін табатынын айтып, орынбасары Николай Ушаковқа басшылыққа алуды тапсырды.
Роллан Машпиыков атты азаматтың мемлекеттік тіл мәртебесі туралы сауалына қалалық мәдениет және тілдерді дамыту бөлімінің басшысы Назерке Аққожина жауап берді:
— Қаладағы барлық мемлекеттік мекемелердің қасбетінде мекеме атауы екі тілде жазылған. Бұл бағытта арнайы комиссия да жұмыс істейді. Көшелерде ілінген жарнамалар мен баннерлерде орын алған қателіктерге байланысты бөлім тарапынан ескертулер жасалып отырады. Ал мемлекеттік тілді үйрету мәселесіне келсек, мәдениет және тілдерді дамыту бөліміне қарасты Тілдерді оқыту орталығы жұмыс істейді. Кез келген қала тұрғыны бұл орталықта қазақ, орыс, ағылшын тілдерін тегін үйрене алады. Соңғы уақытта латын графикасы мен емле ережесі де оқытылуда,- деді Н.Аққожина.
Кездесу барысында тұрғындардың барлық сауалдарына жауап берілді. Көбіне қаланың шет аудандарындағы тұрғындар қоқыс шығару, контейнерлер орнату, су тасқынының алдын алу, су тарту, жол жөндеу, балалар ойын алаңдарын салу мәселелерін көтерді. Ермак Бидахметұлы қалалық бюджеттің мүмкіндігіне қарай жұмыстар жүргізілетінін, тұрғындардың бірде-бір мәселесі назардан тыс қалмайтынын атап өтті.
Жадыра ТӨЛЕГЕНҚЫЗЫ, «Семей таңы{jcomments off}
