Қала әкімі Ермак Сәлімов Шаған кентінде болып, тұрғындармен кездесті. Жиында шаһар басшысы кенттегі
мектеп өз жұмысын бұрынғы тәртіпте жалғастыратынын, ғимаратта ағымдағы жылы жөндеу жұмыстары жүргізіліп, қайта жоспарлаудан өтетінін айтты.
— Білім сапасын жақсарту — біздің басты міндетіміз,- деп атап өтті Ермак Сәлімов. – Білім саласында облыс әкімі Даниал Ахметовтің тарапынан көп жұмыстар атқарылуда. Мектептер робототехника кабинеттерімен жабдықталған. Қазір біздің тәжірибемізді басқа өңірлер қолданып жатыр. Қайта жоспарлау барысында мектеп сумен қамтамасыз етіледі. Қазір қалалық бюджеттен қаражат бөлу бойынша есеп жүргізілуде.
Ермак Бидахметұлы ағымдағы жөндеу жұмыстарын жаңа оқу жылына дейін аяқтауды тапсырды. Кент тұрғындары қала әкімінің бұл шешіміне ризашылықтарын білдірді. Естеріңізге сала кетейік, Шаған кенті Семей қаласынан 70 шақырым жерде орналасқан. Елді мекенде 449 адам тұрады. Ондағы мектепте 70 бала оқиды. Ғимаратта барлығы 5 кабинет бар. Туу көрсеткішінің төмендеуіне және халықтың басқа жаққа қоныс аударуына байланысты кентте жаңа мектеп салу орынсыз деп табылып, 5-9 сынып оқушыларын көрші Бөдене ауылының оқу орнына ауыстыру жоспарланған болатын. Бірақ сол кезде кент тұрғындары бұл шешіммен келіспеген еді.{jcomments off}
