Сенбі, 16 ақпан күні Семей қаласында Ермак Сәлімовтің қатысуымен су тасқыны қаупі бар аудандарда рейд жүргізілді.
Бірнеше сағат ішінде барлық аудандар араланды. Рейдке қатысушылар Омская, 5-өткел, Потанин көшелері, әуежай ауданы, Степной және Мирный кенттеріндегі ахуалмен танысып қайтты. Қала әкімі арықтардың жағдайына баса назар аударды. Бүгінде коммуналдық мекеме қызметкерлері арықтарды тазалау жұмыстарын белсенді түрде атқаруда. Бірақ арықтар жеке аулалар арқылы өткендіктен, үй иелері жұмысшыларды өз учаскелеріне жібермейді. Осыған орай Е.Сәлімов коммуналдық мекеме қызметкерлеріне тұрғындармен жұмыс жүргізуді тапсырды.
Тұрғындармен әңгімелесу кезінде қала әкімі жеке сектордың басым бөлігі күл-қож қалдықтарын шығару бойынша келісімшарт жасамайтынын және оларды өз бақшаларына жинайтынын анықтады. Осының салдарынан арықтар бітеліп қалған. Қала басшысы учаскелік инспекторларға бұл проблеманы ерекше бақылауға алып, күл-қож қалдықтарын далаға тастайтын барлық тұрғындарға ескерту жасау керектігін айтты.
Шаһар басшысы Мирный кентінде жағалауды нығайту жұмыстарын жүргізуді тапсырды.
Биылғы жылы жауын-шашын көп түскенін атап өткен Е.Сәлімов қар шығару жұмыстары қарқынын күшейту және қаладағы әрбір су тасқыны қаупі бар учаскені бақылауда ұстау күн тәртібіндегі мәселе екенін атап өтті.
Естеріңізге сала кетейік, көктемде қала бойынша 57 су тасқыны қаупі бар учаске анықталған болатын. Олардың 50-і қауіпті аймақ тізімінен шығарылып, қалған 7 учаске бойынша жұмыс жүргізілуде.{jcomments off}
