Аптаның дүйсенбісі жаңа Үкіметтің қайта жасақталуымен басталды. Сағынтаев Үкіметі тарағаннан кейінгі халықтың күткені де осы жаңалық болатын.
ҚР Парламенті Мәжілісінің отырысында Елбасы Н.Назарбаев Премьер-министр лауазымына осы кезеңге дейін Үкімет басшысының орынбасары қызметін атқарған Асқар Маминнің кандидатурасын ұсынып, депутаттар бір ауыздан мақұлдады.
Биліктің сан түрлі баспалдағынан өткен Асқар Ұзақбайұлы бірінші вице-премьер лауазымында 2016 жылдың қыркүйегінен бастап қызмет етіп, Үкімет тараған уақытта Премьер-министрдің міндетін атқарды. Айта кетерлігі, Мамин басқаратын ендігі Үкімет ең сындарлы шаққа тура келді. Осыған дейінгі Үкімет көпбалалы аналарды әлеуметтік қамту, жұмыссыздық сынды өзекті мәселелерді шешуде өткір сынға ұшырап, соңы Президент Үндеуінен кейін таратылуға әкелген болатын. Ал А.Маминнің сол Үкіметтің құрамында қызмет атқарғанын ескерсек, күрмеулі мәселелердің ендігі шешімі қалай болар екен деген сұрақ туындайды. Дегенмен көптің көңілінен шығып, әсіресе бір кездері өзі бастамашы болған шекаралы аймақтарды дамыту сынды кезек күттірмес шараларды жүзеге асыруда Маминнің Үкіметінен үміт бар.
Мұнымен қатар Парламент қабырғасындағы отырыста Сенат депутаттары Ұлттық банк төрағалығына қаржы саласында елеулі еңбек өтілі бар Ерболат Досаевтың кандидатурасын қабылдады. Ал аталмыш лауазымда осыған дейін қызмет еткен Данияр Ақышев Мемлекет басшысының рұқсатымен отставкаға кетті.
Жаңа Үкіметке қатысты тағы бір жаңалық — елімізде Қорғаныс және аэроғарыш өнеркәсібі министрлігі қайта құрылды. Сондай-ақ, Жарлыққа сәйкес, Ақпарат және коммуникациялар министрлігі қысқартылып, оның функциялары бұрынғы Қоғамдық даму министрлігіне тапсырылды. Осылайша, ҚР Ақпарат және қоғамдық даму министрлігі пайда болды. Осы орайда «бұл өзгерістер не үшін қажет болды?» деген заңды сауал туындайды. Онсыз да нақты ресми статусы жоқ, бұған дейін де сан түрлі министрлік қарамағында болған журналистер қауымы құқықтық, әлеуметтік қамқорлықты әлі де қажет етумен келеді.
Жасақталып жатқан жаңа Үкімет құрамында жаңа тағайындаулар әлі де орын алуда.
Десек те елдің елеңдей күткені Еңбек және халықты әлеуметтік қорғау министрінің орны болатын. Бұл лауазымға Елбасының Жарлығымен Ақтөбе облысының әкімі қызметін атқарған Бердібек Сапарбаев тағайындалды. Б.Мәшбекұлы 2007-2009 жылдары аталмыш лауазымда қызмет атқарып, бірқатар реформаларды сәтімен жүзеге асырғаны белгілі. Ендеше, әлеуметтік салада жағымды жаңалықтар орын алар күн алыс емес деген үміт бар.
Қазақстан Республикасы
Үкіметінің жаңа құрамы:
Смайылов Әлихан Асханұлы — Қазақстан Республикасы Премьер-министрінің бірінші орынбасары, Қазақстан Республикасының Қаржы министрі;
Гүлшара Наушақызы Әбдіқалықова – Қазақстан республикасы Премьер-Министрінің орынбасары;
Жеңіс Махмұдұлы Қасымбек – Қазақстан Республикасы Премьер-министрінің орынбасары;
Бердібек Мәшбекұлы Сапарбаев – Қазақстан Республикасының Еңбек және халықты әлеуметтік қорғау министрі;
Күләш Ноғатайқызы Шамшидинова – Қазақстан Республикасының Білім және ғылым министрі;
Сапархан Кесікбайұлы Омаров – Қазақстан Республикасының Ауыл шаруашылығы министрі;
Атамқұлов Бейбіт Бәкірұлы — Қазақстан Республикасының сыртқы істер министрі;
Ермекбаев Нұрлан Байұзақұлы — Қазақстан Республикасының Қорғаныс министрі;
Ерлан Заманбекұлы Тұрғымбаев — Қазақстан Республикасының Ішкі істер министрі;
Дәурен Әскербекұлы Абаев — Қазақстан Республикасының Ақпарат және қоғамдық даму министрі;
Роман Васильевич Скляр — Қазақстан Республикасының Индустрия және инфрақұрылымдық даму министрі
Руслан Ерболатұлы Дәленов — Қазақстан Республикасының ұлттық экономика министрі;
Бекетаев Марат Бақытжанұлы — Қазақстан Республикасының Әділет министрі;
Біртанов Елжан Амантайұлы — Қазақстан Республикасының Денсаулық сақтау министрі;
Арыстанбек Мұхамедиұлы — Қазақстан Республикасының Мәдениет және спорт министрі; Жұмағалиев Асқар Қуанышұлы — Қазақстан Республикасының цифрлық даму, қорғаныс және аэроғарыш өнеркәсібі министрі;
Қанат Алдабергенұлы Бозымбаев — Қазақстан Республикасының Энергетика министрі.
«СТ — ақпарат». {jcomments off}
