Өткен жұма, 23 ақпан күні Абай театрында жазушы-журналист, Қазақстан Журналистер одағы сыйлығының лауреаты, ұзақ жылдар республикалық «Егемен Қазақстан» газетінің Семей қаласындағы меншікті тілшісі қызметін атқарған Дәулет Сейсенұлының 70 жылдық мерейтойына және шығармашылығының 50 жылдығына арналған кеш өтті. Кешке қала әкімі Ермак Сәлімов, академик Ғарифолла Есім, профессор Тұрсын Жұртбай, «Егемен Қазақстан» газетінің басқарма төрағасы Дархан Қыдырәлі, қаламгер, ақын Бауыржан Жақып және Дәулет Сейсенұлының әріптестері, достары, қала тұрғындары қатысты.
Дәулет Сейсенұлы – қазақ әдебиетінде өзіндік орнын қалыптастырған жазушы-журналист, драматург, Семей қаласы мен Абай ауданының Құрметті азаматы, Семей қаласының Шәкәрім атындағы мемлекеттік университетінің Құрметті профессоры. «Жұлдыздар сөнбейді», «Қазақтың саны қанша», «Семей елі. Семей жері», «Шежірелі Шыңғыстау», «Шәкәрім» ғұмырбаяндық шығармаларының, «Өзге емес, өзім айтам өз жайымды» деректі еңбегінің және әр қилы тақырыптарды қамтитын 7 драмалық пьесаның авторы.
Кешті Қазақстан Жазушылар одағының Семей қалалық филиалы төрағасы, «Дарын» мемлекеттік жастар сыйлығының иегері Мерей Қарт жүргізіп отырды. Кеш шымылдығы Абай атындағы қазақ-музыкалық драма театры әртістерінің Ербол Жуасбектің режиссерлігімен сахналанған Дәулет Сейсенұлының «Жәнібек ән салады» пьесасымен ашылды. Жазушының сондай-ақ жан-жақты талант иесі Жәнібек Кәрменовке арналған деректі кітабы «Фолиант» баспасының «Нар тұлға» сериясынан жарық көрген болатын.
— Құрметті Дәулет Сейсенұлы, Сізді мағыналы ғұмырыңыздың биік бір белесі 70 жасқа толған мерейтойыңызбен құттықтаймыз! Сіз көп жылдар бойы Семей өңірінің әлеуметтік-экономикалық және рухани дамуына зор үлес қосып келесіз. Қазақ журналистикасы, әдебиеті және драматургия саласындағы орасан еңбегіңіз көпшілік қауымның ыстық ықыласына ие болды. Семей мен Абай халқының Сізге деген құрметі ерекше. Бүгін, міне, 70-тің белесіне тың жігер, жарқын көңілмен келіп отырсыз. Құрметті Дәулет аға, мерейтой қарсаңында Сізге шығармашылық табыс, зор денсаулық, қажымас қайрат, отбасылық құт-береке тілеймін!- деген қала әкімі Ермак Сәлімов мерейтой иесінің иығына шапан жауып, құрмет көрсетті.
Кеш барысында облыс әкімі Даниал Ахметовтің, Ақпарат және коммуникациялар министрі Дәурен Абаевтың, Мәдениет және спорт министрі Арыстанбек Мұхамедиұлының, Қазақстан Журналистер одағының мүшесі Райхан Ахметованың және өзге де әріптестерінің құттықтау хаттары оқылды. Профессор Ғарифолла Есім, «Егемен Қазақстан» газетінің басқарма төрағасы Дархан Қыдырәлі, жерлес қаламгер, Қазақстан Жазушылар одағы басқарма төрағасының орынбасары, ақын Бауыржан Жақып, Семей қаласының Шәкәрім атындағы мемлекеттік университетінің ректоры Мейір Ескендіров, өнертанушы Кенжеғали Мыржықбаев, Абай ауданы әкімінің орынбасары Бауыржан Тәттібеков Дәулет Сейсенұлын мерейтойымен құттықтап, естелік сыйлықтар табыстады.
Әндер шырқалып, Дәулет Сейсенұлының өмірі мен шығармашылығына шолу жасалды.
Жадыра ТӨЛЕГЕНҚЫЗЫ, «Семей таңы»{jcomments off}
