Қалалық Достық үйінде «Нұр Отан» партиясының демеушілігімен қарттарға арналған Белсенді өмір сүру орталығы ашылды.
Қарттарға арналған Белсенді өмір сүру орталығы «Нұр Отан» партиясының 20 жылдығына орай «Ардагерлерді ардақтайық» жобасы аясында Қазақстан халқы Ассамблеясының қолдауымен ашылып отыр. Мұнда шахмат пен дойбы алаңы, шет тілі мен латын қарпін үйрететін үйірмелер, сондай-ақ би мен ән үйірмесі жұмыс істеп тұр.
— Белсенді өмір сүру орталығын ашудағы мақсатымыз — қарттардың қоғамға толыққанды араласуына жағдай жасау. Мұнда кабинет жасақталып, қарттармен жұмыс істейтін арнайы маман тағайындалды. Ол орталықта қандай қызметтер көрсетілетінін түсіндіріп, қарттардың қалауын сұрап, біліп отырады. Белсенді өмір сүру орталығы ата-әжелеріміздің бір уақыт ауру-сырқауларын ұмытып, қызықты және пайдалы іспен айналысуларына мүмкіндік береді,- дейді мәдениет және тілдерді дамыту бөлімінің басшысы Назерке Аққожина.
Орталықта алдағы уақытта смартфон пайдалануды үйрететін үйірме де ашылмақ. Қарттар смартфон телефонды қосып-өшіру, қоңырау шалу, бағдарлама орнату, онлайн-кітап оқу сияқты қызметтерді меңгермек. Ал жылжымалы кітапхана жобасы аясында орталыққа келушілер кітапты үйге дейін жеткізу қызметін пайдалана алады. Сонымен қатар медиация орталығында тегін заңгерлік көмек көрсетіледі.
Жадыра ТӨЛЕГЕНҚЫЗЫ, «Семей таңы» {jcomments off}
