Өткен жұмада қалалық әкімдікте мәслихат сессиясының кезекті отырысы өтті. Жиын барысында халық қалаулылары қала әкімі Ермак Сәлімовтің атқарылған жұмыстар туралы есебін және экономика және бюджетті жоспарлау бөлімі басшысы міндетін атқарушы Елена Кузнецованың Семей қаласының 2019-2021 жылдарға арналған бюджетіне енгізілген өзгерістер туралы хабарламасын тыңдады.
Алдымен қала әкімі Ермак Сәлімов Семейде көктемгі су тасқынының алдын алуға байланысты атқарылып жатқан жұмыстармен таныстырды. Өткен жылы қалада орын алған су тасқыны зардаптарын жою, алдын алу {jcomments off}үшін биыл жергілікті және республикалық бюджеттен қаржы бөлінген.
— Су тасқынының зардабын мүмкіндігінше азайту мақсатында алдын алу шараларын бастап кеттік, — деді қала әкімі есебінде. – Қар шығару жұмыстары жүйелі жүргізілуде. Әсіресе нөсер-дренажды кәріз жүйесі орнатылмаған көшелерге баса мән берудеміз. Қазіргі күні қалалық коммуналдық мекеме қызметкерлері еріген қар суын айдап шығарумен айналысуда. Коммуналдық мекеме бір мезетте 3 мың текше метр суды айдап шығаруға қауқарлы. Қауіп–қатер төніп тұрған жоқ, дегенмен бірқатар көшелерде үлкен су көлемінің жиналуына байланысты қозғалыс қиындады. Бөгеттер орнатуға бюджеттен қаржы бөлінді. Өткен жылы Ертіс жағалауын бекіту жобасына түзетулер енгізілген болатын. Биыл жоба мемлекеттік талдаудан өтеді. Жағалауды бекіту жұмыстары республикалық бюджет есебінен жүзеге асады деп күтілуде, — деді Ермак Бидахметұлы.
Шығыс және Восход кенттері жер асты суларының көтерілуіне байланысты соңғы жылдары су басу қаупі жоғары аймақтар қатарына жатқызылып келеді. Қала басшылығы бұл аймақтарда да алдын алу жұмыстарын ерте қолға алған. Дегенмен бұл әрқашан тиімді бола бермейді.
— Биыл Восход және Шығыс кенттері үшін арнайы жобаны қолға алмақпыз. Ол жер асты суы деңгейінің көтерілу салдарынан болатын тасқынның алдын алуға мүмкіндік береді. Бұл бағытта қаржы бөлінді. Ал басқа аудандарда кәріз жүйелерін қалпына келтіру жұмыстары жалғаса береді, — деді Е.Сәлімов.
Абаттандыру, жол жөндеу, құрылыс және өзге де салаларға тоқталған Ермак Бидахметұлы Семейде наурыз айының соңынан бастап қосымша әуе рейстері ашылатыны туралы мәлім етті.
— Семейліктердің әуе рейстеріне деген сұранысы артып келеді. Бүгінде шаһарда «Qazaq Air» және «Южное небо» компаниялары жұмыс жасауда. Енді бұл тізімге «SCAT» және «Сибирь» компаниялары қосылмақ. 31 наурыздан бастап Семейден тікелей Астана, Алматы, Мәскеуге ұшақпен қатынауға болады. Әуежайды қайта қалпына келтіру жұмыстары толық аяқталғанын білесіздер. Соның нәтижесінде қосымша әуе рейстерін ашу мүмкіндігі туды. Таяуда Өскемен қаласының әуежайында да жөндеу жұмыстары басталып, уақытша жабылады. Сол себепті рейстерді Семей әуежайы жүзеге асыратын болады, — деді Ермак Бидахметұлы.
«ШҚО Семей қаласы әкімдігінің құрамын бекіту туралы» 2018 жылғы 22 ақпандағы Семей қаласы мәслихатының №23/145-VI шешіміне енгізілген өзгерістер туралы да осы сессия барысында айтылды.
Жадыра ТӨЛЕГЕНҚЫЗЫ, «Семей таңы»
