Көпбалалы отбасынан шыққан балалар мектеп формасын, жазғы лагерьге жолдаманы, сондай-ақ мектепке дейінгі, техникалық және кәсіптік білімді тегін алады.
Облыс әкімінің орынбасары Әсем Нүсіпованың төрағалығымен өткен кәмелетке толмағандардың істері және олардың құқықтарын қорғау жөніндегі облыстық комиссияның отырысында көпбалалы және аз қамтылған отбасыларды қолдау жөніндегі шаралар туралы баяндалды. Кездесу облыстың барлық аудандары мен қалалары үшін селекторлық режімде өтті.
Жаңа оқу жылында жалпы білім беру қорының қаражаты есебінен білім ордалары мектеп формасын сатып алады. Осылайша, көпбалалы және аз қамтылған отбасылардан шыққан 33 582 оқушыға тегін мектеп формасы беріледі. Осы мақсатта облыстық бюджеттен қосымша 500 млн. теңге бөлінетін болады.
Сонымен қатар ата-аналардың өтініштерін ескере отырып, жергілікті бюджет қаржыландыратын мектеп формасының үлгісі таңдалды. Бұл – күнделікті киюге арналған киім, қысқы және спорттық форма, күртелер мен аяқ киім. Аталған отбасылардың әр баласына ата-анасының таңдауымен тек бір ғана киім беріледі.
Ерекше білім беруді қажет ететін және көпбалалы отбасынан шыққан балаларға мектепке дейінгі мекемелерге бару тегін болмақ. Бұған дейін жергілікті бюджет балабақшадағы білім беру қызметін ғана қаржыландырып отырған. Ал енді бүлдіршіндер тегін тамақтанатын болады. Осы мақсатта қосымша 266,4 млн. теңге бөлінеді. Көпбалалы отбасылардан шыққан студенттер колледждерде тегін білім алады.
Білім басқармасы көпбалалы, аз қамтылған отбасынан шыққан, жетім және ата-анасының қамқорлығынсыз қалған 9-11 сынып оқушыларының санын анықтады. Олар еңбек нарығында сұранысқа ие мамандықтар бойынша ТжКБ жүйесінде тегін оқытылады.
— 2019 — 2020 оқу жылына студенттерді қабылдауға 7 930 орын беріледі. Ол үшін 5,4 млрд. теңге жұмсалады. Сондай-ақ аудандардағы оқушыларға кәсіптік бағдарлау жұмысын жүргізіп, қажетті мамандықты таңдауға мүмкіндік беру керек, — дейді облыс әкімінің орынбасары Әсем Нүсіпова.
Сонымен қатар жиында жақында өтетін мәслихаттың кезекті сессиясында, көпбалалы отбасыларға қолдау көрсету шараларымен қоса, колледждерді жабдықтауға байланысты үш жылдық бағдарлама да қолдау табатыны айтылды. Бұл үшін 7 млрд. теңге бөлу жоспарланып отыр.
Облыстағы көпбалалы және аз қамтылған отбасылардан шыққан оқушылар жазғы демалысқа барады. 2018-2019 оқу жылындағы 1-10 сынып оқушыларының саны 176 244 адамды құрайды. Биыл облыста 990 сауықтыру лагері жұмыс істейтін болады.
— Биыл қалалар мен аудандардың бюджеттерінен 280 151 мың теңге қаражат бөлінді, бұл өткен жылмен салыстырғанда 20 пайызға артық. Аталған отбасылардағы оқушылар мен мүмкіндігі шектеулі балалар жазғы демалыспен міндетті түрде қамтылады,- деді облыстық білім басқармасының басшысы Сайрангүл Жұмаділова.
ШҚО Ақпарат орталығы{jcomments off}
