Апта дүйсенбісі, 25 наурыз күні семейліктер мен қала жастары ұлтымыздың ұйытқысы ҚР Тұңғыш Президенті — Елбасы Нұрсұлтан Әбішұлы Назарбаевқа ризашылық сезімдерін білдіру мақсатында Абай театрында бас қосып, «Ақордам, астанам, Нұр-Сұлтан – бас қалам» атты акция ұйымдастырды.
Асқаралы Алатау төсінен ел астанасын Сарыарқа төріне, ерке Есіл жағалауына қондырған Елбасының ерлігі ерен. Қазақстан Республикасы Тұңғыш Президенті Нұрсұлтан Әбішұлы Назарбаевтың сарабдал саясатының арқасында бүгінде елордамыз әлемдік маңызы бар саяси-экономикалық шешімдер қабылданатын орталыққа айналды.
«Нұр – Сұлтан». Бұл атау — тәуелсіз Қазақстанды өркендетуде өлшеусіз еңбек сіңіріп, елімізді әлемге танытқан ұлтымыздың ұлы перзентіне деген халық құрметінің белгісі.
— Бүгін біз Тұңғыш Президентіміз Нұрсұлтан Әбішұлы Назарбаевқа деген шынайы құрметімізді білдіру үшін арнайы жиналып отырмыз. Бабалар аманаты мен ел сенімін арқалаған Елбасы есімі дүние жүзі елдерінде де кеңінен танымал. Бүкіл әлем қазақстандық даму жолын «Нұрсұлтан Назарбаев феномені» деп таңдана айтады. Күрмеуі қиын мәселенің шешімін табу жауапкершілігін мойнына алған Елбасының беделі, салмақты ойы мен сарабдал саясаты — жаһан жұртына үлгі-өнеге. Нұрсұлтан Әбішұлының тікелей бастамасымен Қазақстан саяси-экономикалық, рухани жаңғыруға бет алып, ауқымды реформаларды іске асырып келеді. 28 жыл ішінде қазақ елі мың жылдық мәні бар оқиғаларды басынан өткізді. Біз Тұңғыш Президентімізге әрқашан қарыздармыз. Елордамызға «Нұр – Сұлтан» атауын беруді Елбасының өлшеусіз еңбегін әділ бағалаудың өнегелі үлгісі деп қабылдаймыз,- деді қала әкімі Ермак Сәлімов.
Сахна мінберіне көтерілген Арап Сіләмұлының айтуынша, Нұрсұлтан Әбішұлының идеясымен негізі қаланған Астана Тұңғыш Президентіміздің төл перзенті болғандықтан, Нұр – Сұлтан деп аталуға әбден лайықты. Шекарамызды шегендеп, жоғымызды түгендеп берген Елбасы ерлігі балаға мұра, ұрпаққа ұран болып қала бермек.
Жас буын өкілдері де жастар атынан Елбасыға алғыс айтып, Нұр-Сұлтан атауын қуана қабылдайтындарын жеткізді.
Акция барысында мерекелік концерт пен флешмоб ұйымдастырылды.
Жадыра ТӨЛЕГЕНҚЫЗЫ,
«Семей таңы»{jcomments off}
