Жуырда қала әкімдігі жанындағы Діни бірлестіктермен байланыс жөніндегі кеңестің кезекті отырысы болып өтті. Басқосуды Семей қаласы әкімінің орынбасары, кеңес төрағасының орынбасары Надежда Шарова жүргізіп отырды.
Кеңес жиынына шаһардағы діни бірлестіктер жетекшілері, қоғамдық ұйымдар басшылары мен өкілдері, әкімдіктің бөлім басшылары қатысты. Кеңес төрағасының орынбасары Надежда Васильевна күн тәртібіндегі мәселелер қатарымен таныстырып өтіп, сөз кезегін Семей қалалық білім бөлімінің басшысы Наталия Фесенкоға берді.
Өз баяндамасында Н.Анатольевна оқу орындарының діни экстремизм мен терроризмнің алдын алуға бағытталған жұмыстарымен таныстырды. Баяндамашы сөзіне сүйенсек, биылғы оқу жылы бойынша шаһардағы орта білім беретін мектептерде өскелең буынды діни сипаттағы экстремизм мен радикалды ұйымдар ықпалынан сақтандыру мақсатында біршама жұмыстар жүргізілген. Педагогтер қауымы да назардан тыс қалмаған. Бұл ретте қалалық ішкі саясат бөлімінің қатысуымен түрлі форматтағы 26 іс-шара өткізіліпті. Аталмыш бағытта арнайы жасалған жоспарлы шаралар әлі де жүргізілуде. Солардың ішінде жасөспірімдерді түрлі спорттық секциялар мен үйірмелерге тартудың маңыздылығы жоғары болып тұр. Осы мәселелер төңірегінде кеңінен сөз еткен Н.Фесенко қазіргі таңда өңіріміздегі білім беру саласында алаңдатарлық жағдайдың жоқ екенін жеткізді.
Ал келесі кезекте Семей қаласының сәулет және қала құрылысы бөлімінен Ардақ Исатаев «Алматы тас жолындағы зираттың қоршалуы туралы» хабарлама жасады. А.Нұратұлы, қала әкімінің қаулысына сәйкес, аталмыш участок бойынша жерді пайдалану құқығы бар екенін және оның көлемі бекітілгенін жеткізді. Бұл аумақта топографиялық зерттемелер жасалынған. Зираттарды қоршау туралы арнайы әзірленген жоспар да бар. Арнайы кескіндемелер де дайындалған. Ол тек қаражат бөлінген соң ғана толық күшіне енгізілмек. Жоспар бойынша, қоршау биіктігі 1,5 метр. Ал металл қоршауға бөлінетін қаражат көлемі сметалық құжаттамалар әзірленген соң мәлім болады.
Кеңес отырысындағы үшінші мәселе Семей қаласындағы дін мәселелерін зерттеу орталығының 2018 жылғы атқарылған жұмыстары болатын. Бұл тақырыпта ШҚО Семей аймағы орталығының директоры Мақсат Кәрібаев кең көлемде баяндама жасады.
М.Серікұлы жыл көлемінде дін мәселелеріне қатысты ақпараттық-түсіндіру жұмыстары үзіліссіз жүргізілгенін айта келіп, басты басымдық жастарға берілгенін атап өтті. Өткен жылы 275 шара өткізіліпті. Оған 18 мың 220 адам қамтылған. Мектеп оқушыларынан бастап студенттер, еңбек ұжымдары мүшелері де қатысқан. Оның ішінде пікірсайыс, тренинг, семинар, кездесу жиындары тұрақты түрде өткізіліпті. Мұнымен қатар сектор мүшелері деструктивті діни ағымдардан зардап шеккен жандарға теологиялық, психологиялық және заңдық тұрғыдан көмек те көрсетеді. Тіпті олардың әлеуметтік ахуалы ескеріліп, материалдық жәрдем беру де қарастырылған. Баяндамашының пікірінше, қазіргі күні шаһардағы діни ахуал тұрақты.
Жиын соңында кеңес мүшелері сөз алып, ұсыныс-пікірлерін білдірді.
Қуаныш ЖОЛЫМБЕТ, «Семей таңы»{jcomments off}
