Сәрсенбі, 27 наурыз күні қалалық әкімдікте өткен жиында ШҚО прокуроры Құсайын Абзалбекұлы Игембаев Семей қаласының прокуроры қызметіне тағайындалған Аймұхан Саид Аймұханұлын таныстырды. Жиынға қала әкімі Е.Сәлімов, қала әкімінің орынбасары Н.Ушаков және салалық бөлім басшылары қатысты.
Аймұхан Саид Аймұханұлы Алтай ауданында 1979 жылы дүниеге келген. Қазақ мемлекеттік заң академиясын құқықтану мамандығы бойынша тамамдаған.
Саид Аймұханұлы Семей қаласының прокуроры қызметіне тағайындалғанға дейін Риддер қаласында прокурор болған. Қызмет жолын 2000 жылы Алтай аудандық прокурорының көмекшісі міндетін атқарушы болып бастап, облыстық прокуратура саласында 14 жыл бойы қызмет етті.
С.Аймұханұлы 2002-2004 жылдары ШҚО прокуратурасы соттарындағы қылмыстық істерді сотта қарау заңдылығын қадағалау басқармасының прокуроры, 2004 жылы ШҚО прокуратурасы басқармасы қылмыстық істер бойынша сот қаулыларының заңдылығын қадағалау бөлімінің прокуроры, ал 2004-2005 жылдары ШҚО прокуратурасы қылмыстық істер бойынша сот қаулыларының заңдылығын қадағалау басқармасының аға прокуроры, сондай-ақ 2005-2007 жылдары ШҚО прокуратурасы қылмыстық істер бойынша сот қаулыларының заңдылығын қадағалау басқармасы басшысының орынбасары қызметтерін атқарған.
Бұдан кейін 2007-2008 жылдары Ұлан ауданы және 2008-2009 жылдары Өскемен қаласы прокурорының орынбасары, 2009-2014 жылдары Алтай ауданының прокуроры болып тағайындалды.
ШҚО прокуроры Құсайын Игембаев Саид Аймұханның адал қызмет атқаратынына сенім білдірді.
— Сіз білікті мамансыз, прокурордың негізгі міндеті азаматтардың құқығын қорғау екенін жақсы білесіз. Семей қаласында прокуратураға түрлі жағдайларға байланысты өтініштер мен арыздар көп келіп түседі. Олардың барлығы заң аясында шешімін табуы қажет. Әрбір жауапқа тартылған адамның кінәсі дәлелді болуы керек. Осыны басты қағида етіп ұстансаңыз, әрқашан абырой биігінен көрінесіз,- деген облыс прокуроры жаңадан тағайындалған Семей қаласы прокурорының қызметіне сәттілік тіледі. — Саид Аймұханұлының басшылығымен Семей өңіріндегі заң саласындағы күрмеулі мәселелердің шешімі табылады деген сенімдемін,- деді ШҚО прокуроры Қ.Игембаев.
Құралай ҚАЙЫРЖАНҚЫЗЫ, «Семей таңы»{jcomments off}
