Көпбалалы аналармен кездескен қала әкімі Ермак Сәлімов «Бақытты отбасы» партиялық жобасы аясында жүзеге асырылып жатқан көпбалалы және аз қамтылған отбасыларды кешенді қолдау бағдарламасы туралы айтып өтті.
— Бұл бағдарламаның негізгі бағыты — көпбалалы аналарды қолдауды күшейту,- деді Ермак Бидахметұлы. — Қалада 4 749 көпбалалы отбасы тұрады, 2350 отбасының 4 және одан да көп кәмелеттік жасқа толмаған балалары бар. Тұрмыстық жағдайлары мен табыс деңгейін зерделеу және әлеуметтік қолдаудың қажетті шараларын айқындау мақсатында мобильдік топтардың жұмысы жалғасуда.
Қала әкімі атаулы әлеуметтік көмек үшін және жұмыспен қамтуды үйлестіру мақсаттарына республикалық бюджеттен 635 миллион теңге көлемінде қосымша қаражат бөлуге өтінім жіберілгенін атап өтті. Бөлінетін қаржы 5 040 мұқтаж отбасыны қамтуға мүмкіндік беретін болады.
— Мүмкіндігі шектеулі балаларды тәрбиелеп отырған көпбалалы отбасылар мектепке дейінгі мекемелерге ақы төлеуден босатылады,- деп мәлімдеді Е. Сәлімов. — Көпбалалы және аз қамтылған отбасындағы 7 062 балаға мектеп формасы сатылып алынып, 6 774 бала тегін ыстық тамақпен қамтамасыз етіледі.
Қала басшысы ата-аналарға қажетті мамандықты меңгеріп, қосымша табыс табуға мүмкіндіктері бар екенін жеткізді. Осы мақсатта «Еңбек» мемлекеттік бағдарламасы шеңберінде 195 жұмыссыз қала тұрғындары үшін қысқа мерзімді курстар ұйымдастырылады.
Сонымен қатар көпбалалы және аз қамтылған отбасыларды тұрғын үймен қамтамасыз ету мәселесі шешілуде. Қазір қалада осы санаттағы азаматтар үшін екі көп қабатты тұрғын үй салынуда. Олардың құрылысы биылғы жылдың соңында аяқталатын болады.
Кездесу барысында көпбалалы аналар қала әкіміне өздерін толғандырған сұрақтарын қойды. Е.Сәлімов қатысушылардың барлығын мұқият тыңдап, барлық мәселелерді жазбаша түрде баяндауды ұсынды. Қойылған сұрақтар білім, тұрғын үй, денсаулық сақтау сияқты әртүрлі тақырыптарды қамтыды. Кездесу соңында «Ақжүніс аналары» қоғамының өкілі Анар Сүлейменова қала әкіміне қолдау көрсеткені үшін алғысын білдіріп, кездесу нәтижелі болғанын атап өтті.
Естеріңізге сала кетейік, Шығыс Қазақстан облысының әкімі Д.Ахметов ақпан айында «Нұр Отан» партиясы облыстық филиалының XXII конференциясында осы кешенді бағдарлама туралы айтып, ШҚО-да көпбалалы және аз қамтылған отбасыларды қолдауға қатысты барлық шараларды күшейтуді тапсырған болатын.
Семей қаласының Ақпараттық орталығы.{jcomments off}
