Жуырда Семей қаласындағы физика-математика бағытындағы Назарбаев Зияткерлік мектебінде Біріккен Ұлттар Ұйымы Моделінің дәстүрлі конференциясы өтті. Осымен 3 – ші мәрте ұйымдастырылған шараға қала мектептерінен, ҚМУ университеті, сондай-ақ Павлодар, Өскемен және Астана қалаларының Назарбаев Зияткерлік мектептерінен -барлығы 120 делегат қатысты.
Конференцияның ашылу салтанатында мектебіміздің директоры Бағдан Қайыржанов, Орталық Азияның БҰҰ Моделі үйлестіру орталығының жетекшісі Валихан Бахретдинов оқушыларды құттықтап, конференцияның сәтті өтуіне тілек білдірді. Сондай-ақ ЮНИСЕФ — тің Қазақстандағы елшісі, шахматтан әлемнің 4 дүркін чемпионы Динара Сәдуақасованың ЮНИСЕФ жетістіктері мен жаһандық проблемаларды шешуде жас ұрпақтың қызығушылығының маңыздылығын атап өткен видеохабарламасы ұсынылды.
Биылғы конференция жұмысында делегаттар түрлі комитеттер құрамына бөлініп, БҰҰ Қауіпсіздік Кеңесі, БҰҰ-ның қоршаған ортаны қорғау бағдарламаларын, Дүниежүзілік денсаулық сақтау ұйымын, БҰҰ-ның Есірткі және қылмыс жөніндегі басқармасы және БҰҰ-ның Адам құқықтары жөніндегі кеңесіне қатысты өзекті сұрақтар бойынша өз ойларын ортаға салды. Міне, осы 6 комитет 2 күн бойы жемісті жұмыс істеді. Көздеген мақсатқа жете білген басқосу жоғары деңгейде өтіп, оған қатысушы оқушыларға ерекше әсер сыйлады. Конференцияны қорытындылау сәтінде 13 делегат «Үздік делегат», «Құрметті атақ» және «Үздік лауазымдық парақ» номинацияларымен марапатталды. Биылғы конференцияның ерекшелігі – жиынға басқа қалалардан оқушылар келіп қатысты және қатысушылардың бір-бірімен тығыз қарым-қатынас жасауына бағытталған түрлі әлеуметтік шаралар ұйымдастырылды, дебаттар өте жоғары деңгейде өтті.
Әлия МҰСТАФИНА,
конференцияның бас хатшысы,
11 «В» сыныбы оқушысы.{jcomments off}
