Бейсенбі, 28 наурыз күні қалалық әкімдікте қалалық мәслихаттың кезекті, ХХХVI сессиясы өтті. Сессия отырысына 16 қалалық мәслихат депутаты, сондай-ақ қала әкімі Ермак Сәлімов, қала әкімінің орынбасарлары Қанат Әділбеков пен Николай Ушаков, Семей қаласы мемлекеттік кірістер басқармасының басшысы Қуаныш Мұхамедқалиев, қоғамдық ұйым өкілдері, прокуратура қызметкерлері және БАҚ өкілдері қатысты. Бұл жолы күн тәртібінде 13 мәселе қаралды.
Қалалық мәслихаттың өткен жылғы атқарған жұмысы туралы қалалық мәслихат хатшысы Бейсенбек Ақжалов баяндама жасады.
— 2018 жылы мәслихат 11, оның ішінде 4 кезекті, 7 кезектен тыс сессия өткізді. 83 мәслихат шешімі қабылданды. Қалалық мәслихатта құқық, бюджет, қаржы, өндіріс және әлеуметтік бағыттарда 4 тұрақты комиссия қызметін жүзеге асырады. Депутаттық корпус қаланың саяси өміріне, әлеуметтік-экономикалық дамуына белсене араласады. 2018 жылы көктем маусымында Семейде төтенше жағдай жарияланғанда, депутаттар атқарушы билікпен бірге су тасқынынан зардап шеккен халыққа қажетті көмек көрсету үшін бірқатар іс-шаралар ұйымдастырды. Қалалық мәслихаттың депутаттары жыл бойы әртүрлі қайырымдылық акциялардың өткізілуіне қол ұшын созып келеді. Ұлы Отан соғысы ардагерлерін қамқорлыққа алып, олардың үйлерін, пәтерлерін, үй маңындағы аумақтарды көркейтуге жәрдемдесіп, дәрі-дәрмекпен қамтамасыз етуде,- деді Б.Ақжалов.
2018 жылғы Семей қаласы бюджетінің орындалуы туралы қаржы бөлімі басшысының орынбасары Мария Осадчая баяндады. Оның айтуынша, 2018 жылы қала бюджетінің шығыс бөлігі 44,7 млрд. теңге көлемінде — жүз пайыз орындалған. Бюджеттің кіріс бөлігінің көбеюі мен бюджеттік бағдарламалар арасындағы қайта бөлу нәтижесінде білім, ауыл шаруашылығы, тұрғын үй — коммуналдық шаруашылық, өндіріс пен құрылыс, мәдениет және спорт салаларына көңіл аударылуда.
Сессияда қаралған үшінші мәселе қалалық кәсіпкерлік бөлімі мен «Ертіс» әлеуметтік — кәсіпкерлік корпорациясының тұрақтандыру қоры өнімдерін сату туралы есебі болды. Айта кетейік, қазіргі күнге дейін тұрақтандыру қоры өнімдерінің 20 пайызы ғана сатылған. Қалған 80 пайызы, яғни 3000 тоннадан астам өнім қоймаларда тұр. Қалалық кәсіпкерлік бөлімінің басшысы Данияр Шакаримовтың айтуынша, мәселе тұрақтандыру қоры өнімдерінің сапасында.
— Кейбір сауда үйлері қор өнімдерін сатып алудан бас тартса, кейбірі өнімдерді қайтарып берді. Біз қалада белгіленген барлық сауда нүктелеріне өнімдерді жеткіздік. Меморандум бар. Тек тауардың сапасы жақсы болуы қажет,- дейді Данияр Шакаримов.
— Сіздер уақытты өткізіп алдыңыздар. Енді қандай шара қолдансаңыздар да, өнімдерді толық сата алмайсыздар. Әрі кетсе 1000 тоннасы ғана сатылуы мүмкін,- деді қалалық мәслихат депутаты Талғат Баймұрынов.
Тұрақтандыру қорына өнімдерді сатып алуды «Ертіс» әлеуметтік- кәсіпкерлік корпорациясы жүзеге асырады. Корпорация басшысының орынбасары Думан Рахметқалиевтың сөзіне сүйенсек, қор өнімдерін көтерме бағамен сатуға мүмкіндік бар. Алайда нарықтағы бағаның әлдеқайда төмен екенін есепке алсақ, көкөністердің бағасын төмендетіп, жеделдетіп сату мәселенің шешімі бола алмайды. Бүгінгі күні тұрақтандыру қоры өнімдерінің бір келісі 65 теңгеден сатылуда. Ал бағаны 45 теңгеге дейін төмендету туралы корпорацияға жазылған хат жауапсыз қалған.
— «Ертіс» әлеуметтік корпорациясының құрылтайшысына хат жолдауымыз керек. Корпорация барлық шығынды өз мойнына алып, сауда нүктелерінде өнімді 45 теңгеден сатуға қоюы тиіс. Егер көтерме бағамен сатсақ, өнімдерді бөлшек бағамен сатып алатын тұрғындардың қалтасын қағуға мүмкіндік береміз,- дейді қалалық мәслихат депутаты Зүльфия Жамалтдинова.
Биыл тұрақтандыру қорындағы өнімдер қатарына қант қайтарылды. Халық қалаулылары қанттың бағасына қатысты да алаңдаушылық білдірді.
— Соңғы екі жылда маусым, шілде айларында қанттың бағасы 350 теңгеге дейін көтерілді. Тұрақтандыру қорындағы 200 тонна қант Семейдің халқы үшін жеткіліксіз. Сондықтан бұл өнімнен тапшылық болады. Алдағы уақытта 400 теңгеге дейін қымбаттауы мүмкін. Қорды ұйымдастырудағы мақсат халық көп тұтынатын өнімдердің бағасын тұрақтандыру болғандықтан, сіздер қант бағасын да реттеулеріңіз керек,- деді қалалық мәслихат депутату Қайрат Мирашев.
— Тұрақтандыру қорын құру біздің шотымыздағы қаржыға байланысты. Бүгінде Семейде 310 тонна қант бар. Бұл бағаны реттеуге жеткілікті. Қант бөлшек бағада сатылады. Егер комиссия 15 теңге көлеміндегі үстеме бағаны қабылдаса, маусым айында қант 250 теңгеден сатылады,- дейді «Ертіс» әлеуметтік-кәсіпкерлік корпорациясы басшысының орынбасары Думан Рахметқалиев.
Сессияда сондай-ақ Семейдегі ішкі туризмді дамыту туралы қалалық спорт бөлімінің басшысы Мұрат Құржықаевтың және Семей өңіріне қарасты ауылдық округтердің 2018 жылғы бюджетінің орындалуы туралы ауылдық округ әкімдерінің есептері тыңдалды.
Жадыра ТӨЛЕГЕНҚЫЗЫ, «Семей таңы»{jcomments off}
