Семей қаласы бойынша санитарлық-тазалық шараларын жүргізудің экологиялық екі айлығы басталды. Аталмыш шара сәуірдің 1-нен 31 мамырға дейін жалғасатын болады. Бұл туралы апта дүйсенбісінде қала әкімі Ермак Сәлімовтің төрағалығымен өткен жиын барысында мәлім етілді.
Қалалық әкімдікте өткен басқосуға бөлімдер мен мекемелер басшылары, қалалық мәслихат депутаттары, қоғамдық ұйымдар мен бірлестіктер жетекшілері және қоғам белсенділері, журналистер мен құқық қорғау органы өкілдері қатысты.
Жиын беташарында сөз алған шаһар басшысы Е.Бидахметұлы қаламыз бойынша ұйымдастырылатын санитарлық-тазалық шаралары бойынша бірқатар мәселелер бар екендігін жеткізе келіп, осы жағдайға байланысты кеңесудің маңыздылығына тоқталып өтті.
Көпшілік алдында алдымен Семей қаласының тұрғын үй-коммуналдық шаруашылық және тұрғын үй инспекциясы бөлімінің басшысы Амантай Өтелбаев кең көлемде баяндама жасады. Өз сөзінде А.Хайроллаұлы биылғы жылғы тазалық айлығы барысында қолға алынатын жұмыстар қатарына тоқталды.
— Сенбілік жұмыстарына қаламыздағы барлық мекемелер мен ұйымдар және жеке сектордағы тұрғын үйлер иелері толығымен қатысуы тиіс. Айта кетерлігі, тазалық екі айлығы тек нысандар аумағы мен көшелер бойын, аулаларды тазалап, қалыпқа келтірумен шектелмеуі қажет. Сонымен қатар ғимараттар қасбеттерін әрлеп, гүлзарлар мен тал көшеттерін отырғызып, көгалдандыру жұмыстарын да жүргізу керек. Бұл ретте Өскемен қаласынан 31 мың тал өскінін алдыру көзделуде. Яғни терек, шетен, көктерек сынды сәндік талдардың көшеттеріне тапсырыс берілді,- деді өз сөзінде бөлім басшысы.
Амантай Хайроллаұлы сонымен қатар сенбіліктерді өткізуге даярлық шараларына да тоқталды. Бұл ретте сәуір айының барлық сенбі күндері мен мамыр айының 4-ші жұлдызында сенбілік өткізу белгіленген. Оған барлық еңбек ұжымдары, ұйымдар мен қалалықтар тартылатын болады.
Осыдан соң қала әкімі жиынға қатысушыларға кезек берді. Сөз алған мекеме басшылары, негізінен, тазалық екі айлығына байланысты бөлім басшысына сауалдар қойды. Өз кезегінде сөз алған «ҚТЖ ҰК» АҚ Семей жүк тасымалы бөлімшесінің басшысы, қалалық мәслихат депутаты Марлен Көкрекбаев шаһар ішін көктей өтетін темір жол желісі бойындағы тазалық мәселесін алға тартты. М.Кәрімұлының айтуынша, рельстің қос қапталындағы 3 метрлік жер ғана теміржолшылар қарамағында. Алайда олар бүкіл желі бойын толық тазалап шығуға мәжбүр. Әсіресе Жаңа-Семей аумағындағы гараж кооперативтері аймағы бойынша мәселе күрделі болып тұр. Шаһар орталығы болса да, жекеменшік иелері өз аумақтарын тазартуға құлықты емес. Сол себепті де қалалық әкімдіктің және тәртіп сақшыларының көмегі қажет.
Ермак Бидахметұлы бұл ретте өткен жылдардағыдай көмек жасалатынын айтты. Яғни полиция қызметкерлерімен бірлесіп рейдтік шаралар ұйымдастырылып, күл-қоқысты темір жол бойына төгетін жеке сектордағы тұрғындарға әкімшілік айыппұл салынатын болады. Сондай-ақ қоқыстарды тасымалдап шығару үшін көліктер берілмек.
Сол тәрізді жиын барысында ашық қалған люк қақпақтары мәселесін сөз етіп, қаладағы заңсыз металл қабылдайтын орындарға қатаң тексеру жүргізу қажеттігін айтқандар да болды. Сонымен қатар құрылыс қалдықтарын арнайы белгіленген қоқыс полигонына төгу, тұрмыстық қалдықтарды шығару бойынша арнайы компаниялармен келісімшартқа отырмаған жеке секторлар тұрғындарымен жұмыс жүргізу керектігі де сөз болды.
Жиын барысында жастар мәслихатының депутаты, қоғам белсендісі Сұлтан Мейрамбеков сөз алып, шаһар жастары алдағы сенбіліктерге белсене қатысуға даяр екендігін жеткізді.
Қ.ЖОЛЫМБЕТ, «Семей таңы»{jcomments off}
