Семейде 16 мемлекеттік балабақшаның 5-уі сенімгерлік басқаруға беріліп, екі мектепке дейінгі мекеме мемлекеттік-жекеменшік әріптестік аясындағы жұмыс жүйесіне көшуге дайындалуда.
Қала әкімі Ермак Сәлімов балабақшаларды аралап, мектепке дейінгі мекемелердің ұжымымен және бүлдіршіндердің ата-аналарымен әңгімелесті. Тәрбиешілер мен бала күтушілер, аспаздар қала басшысына инвестордың келуімен балабақшадағы жағдайдың әлдеқайда жақсарғанын айтты.
— Балабақшаны сенімгерлік басқаруға беру туралы хабарды естігенде таңғалған едік,- деді қала әкіміне «Айдана» балабақшасының тәрбиешілері. — Енді не болады деген қорқыныш сезімі болды. Бірақ біздің балабақшаның көз алдымызда өзгергенін көргеннен кейін қатты қуандық. Ғимаратта жөндеу жұмыстары жүргізіліп, жаңа жиһаз, техника мен ойыншықтар сатылып алынды. Жұмыс істеу үшін барлық жағдай жасалды.
Барлық балабақшаларда бұрынғы ұжым сақталған. Мекемедегі жас мамандар қала әкіміне МЖӘ шеңберінде біліктілікті арттыру курстарынан өтуге және инвестор есебінен балаларға арналған конкурстарға қатысуға мүмкіндік пайда болғанын айтты.
— Біз ең алдымен бала-бақшаларда бұрынғы ұжымның құрамын сақтауымыз керек,- деп атап өтті Ермак Бидахметұлы. — Мектепке дейінгі мекемелерді сенімгерлік басқаруға бере отырып, біз инвесторларға қойылатын талаптарды күшейтетін боламыз. Өйткені біз үшін ең бастысы — балаларымыздың дамуы және жайлы ортада білім алуы.
Балабақша қызметкерлерінің еңбектері жаңа басшылар тарапынан ескерусіз қалып отырған жоқ. Мысалы, кейбір мектепке дейінгі мекемелерде сыйлық берілсе, «Айдана» балабақшасында үздік үш тәрбиешіге Түркияға жолдама тапсырылды.
Айта кетейік, барлық 5 бала-бақша қалалық білім бөлімінің бақылауында. Білім бөлімі басшысы Наталия Фесенко мектепке дейінгі мекемелердің шатыры жөнделіп, бейнебақылау камералары орнатылып, материалдық-техникалық базасы жаңартылып жатқанын айтты.
Семей қаласының Ақпараттық орталығы.{jcomments off}
