Өскеменде іс басына бір қаракөз келсе, мың жоғымыз табылғандай қуанатынымызды жасырмаймын… Бұл аптаның жағымды жаңалықтарының бірі — Серік Жеңісовтің Өскемен қаласы әкімінің орынбасары болып тағайындалуы. Жас болса да мемлекеттік қызметтің біраз баспалдақтарынан өтіп, тәжірибе жинаған азамат. Өмірбаян деректерін түгел тізбектеп шығу артық болар, соңғы қызмет орындары — облыстық ішкі саясат басқармасы басшысының орынбасары, «Шығыс-Ақпаратқа» бір жылға таяу уақыт жетекшілік жасады. Елдіктің сөзін айта алатын есті пікірі бар, жұмысына тиянақты, ортасына жайлы Серік бауырымыз енді Өскеменнің әлеуметтік саласын басқаратын болады. Соңғы уақытта Өскеменде жақсы өзгерістердің бар екендігін байқаймыз. Өткен жылы ғана 35 көшесінің атын ауыстырған қаланың идеология саласында жаңа орынбасарды күтіп тұрған жұмыстар әлі де аз емес.
Серік Жеңісұлының жаңа қызметіне табыс тілей отырып, Қазақстанның шығысындағы Бас қаланың идеологиясына тың идеяларымен жаңаша серпін беріп, «Өскеменім, қашан сенен қазақы от көремін» деп Рүстем Есдәулетов арман етіп кеткен ұлттық мүддеге қатысты үлкен істерге үлес қосады деген үміттеміз!
«Семей таңы» және «Вести Семей» газеттерінің шығармашылық тобы атынан Риза МОЛДАШЕВА.{jcomments off}
