Қаламыздағы Достық үйінде қоғамдық ұйымдар мен бірлестіктер, жастар және саяси партиялар өкілдерінің қатысуымен Елбасы Жолдауы басымдықтарының орындалу барысы мен «Nur Otan» партиясының 2030-ға дейінгі бағдарламасын түсіндіру мақсатында басқосу өтті.
Аталмыш шараға Достық үйінің директоры Надежда Шарова, Семей қалалық «Nur Otan» партиясы филиалы төрағасының бірінші орынбасары Айнұр Арғынбекова, партия филиалының ұйымдастыру секторының меңгерушісі Айдос Төлеухановтар қатысып, көпшілік алдында сөз алды.
Өз сөзінде А.Серікпайқызы еліміздегі ең басты, саяси тұрғыдан жетекші партияның ел азаматтарының әл-ауқатын арттыру жолындағы атқарып жатқан іргелі шараларына тоқталып өтті. Бұл ретте халықтың тұрмыс сапасын арттыру, әлеуметтік тұрғыдан аз қамтылған топтарға елеулі жәрдем жасау Елбасы тапсырмасынан туындайтын кезек күттірмес мәселе екенін жеткізген А.Серікпайқызы барша партия мүшелерін, әсіресе жастар мен қоғамдық ұйымдар мүшелерін мейлінше белсенді болуға шақырды.
Сонымен қатар А.Арғынбекова өз сөзінде әлеуметтік сала бойынша қаламызда орын алып жатқан іргелі шаралар қатарына да кезегімен тоқталып өтті. Осы орайда Ұлт Көшбасшысы міндеттемелері аясында Үкімет тарапынан жүргізіліп жатқан көпбалалы аналарды қолдау шараларын баса атап өтуге болады. Қазіргі күні мұндай әлеуметтік топ өкілдеріне жергілікті атқарушы билік пен қалалық партия филиалы тарапынан да айтарлықтай жәрдем көрсетілуде.
Сондай-ақ Семейдегі бастауыш партия ұйымдары да қоғамдық шаралар барысында мейлінше белсенділік танытуда. Атап айтсақ, қаламыздағы 22 мекеменің басшысы партия мүшелігінде әрі мәслихат депутаты саналады. Олардың тарапынан қолға алынған игілікті істер қатарына да көптеп мысал келтіруге болады.
Осы орайда партиялық жобаларға кеңінен тоқталып өткен Айнұр Серікпайқызы партияның жаңғыру аясында нақты жобаларды жүзеге асырып жатқанын да айтып өтті. Соның ішінде цифрландыру үдерісіне үлес қосуға бағытталған ІТ-сыныптар мен орталықтар ашу ісі басты орында тұр. Бұл ретте Семейдегі білім беру саласы партиялық міндеттемелерді орындауда алдыңғы қатарға шыққан жетекші орында тұр десе болады.
Бұдан өзге әлеуметтік әлжуаз топтар үшін үлкен мүмкіндік саналатын «Құтты мекен» бағдарламасы, «Рухани жаңғыру» бағдарламасы аясындағы ағылшын тілін меңгеру және еріктілер қозғалысын дамыту сынды іргелі шараларға да партия мүшелері бастамашы болуда. А.Серікпайқызы аталмыш шаралардың нәтижелі жүзеге асуына алдағы уақыттарда да зор үлес қоса беретіндіктеріне сенім білдірді.
Қ.ӘЛІМБЕК, «Семей таңы»{jcomments off}
