Тағы бір азамат адамзатқа азап арқалатқан атом аждаһасының құрбаны болды. Тағы бір азамат ащысы мен тұщысы, қуанышы мен қайғысы, қадірі мен қасиеті қатар тоғысқан өмір атты ұлы сапарын аяқтады.
Айтып келмейтін ажал ортамыздан жан сарайы мөлдір, рухы мықты, көңілі кең, өзінің ұстаған бағытына бекем, сыйласқан жанмен адал қарым-қатынас жасауға бейім тұратын ардақты азамат Оңдаханов Алмас Аманқолұлын алып кетті. Аяқ астынан ауыр дертке ұшырап, небары 44 жасында, бақилық дүниеге аттанған Алмастың артында қайғырып халқы, ауыр қайғыға батып сүйікті жары, ұл-қыздары, туған-туыстары, көп жылғы қызметтес әріптестері, дос-жарандары қалды.
Алмас Оңдаханов Алматы қаласында туып-өскен. 1995 жылы Жамбыл гидромелиоративтік құрылыс институтын «Мемлекеттік басқару» мамандығы бойынша тамамдаған. Алматыдағы мемлекеттік қызмет академиясынан «Агроөндірістік саладағы экономика және басқару» мамандығын алған. 1995 жылдан бастап мемлекеттік қызметте болды. 2013-2016 жылдары ШҚО-дағы Зайсан ауданының әкімі, 2016-2017 жылдары ШҚО әкімінің аппарат жетекшісі, 2017 жылдың наурыз айынан бастап өмірінің соңына дейін Курчатов қаласының әкімі қызметін атқарды.
Алмас Аманқолұлы қай қызметте болмасын еңбекқорлығымен, адамдармен қарым-қатынаста кісілік келбетімен абыройлы болды. Биік парасатымен, қарапайымдылығымен, көшелі көпшілдігімен, әдемі әзілімен, жанының жайсаңдығымен ортасына сүйкімді болды.
Көңіл қимағанмен, арсыз ажалға қарсы шығар дауа жоқ… Жақсы азаматтың өзі жер бесікке түскенімен, артында айта жүрер ісі, өмірінің жалғасы ұл-қыздары қалды. Тек әлі қанаты қатаймаған балапандарына нағыз керек шақта, еліне бергенінен берері көп жаста кеткені өкінішті… Бір кем дүние…
Туған-туысқандарына, жарына, бала-шағасына қайғыларына ортақтасып көңіл айта отырып, жаның жұмақтың төрінде шалқысын, Алмас Аманқолұлы дейміз…
«Семей таңы», «Вести Семей» газеттері редакцияларының шығармашылық тобы атынан Риза МОЛДАШЕВА
{jcomments off}
