Апта басында Өскемен қаласында «Nur Otan» партиясы облыстық филиалының конференциясы болып өтті. Басқосуға семейлік партия белсінділері де қатысты. Жиын барысында еліміздегі жетекші саяси партияның облысымыздағы мүшелері Нұр-Сұлтан қаласында өтетін партияның кезекті съезіне делегаттар сайлады. Сонымен қатар партияның 2030 жылға дейінгі «Бақуатты қоғам: 10 жылдыққа 10 мақсат» атты бағдарламасының аймағымыз бойынша жүзеге асырылу барысы талқыланды.
Соның ішінде «Nur Otan» партиясы қолға алған «Бақытты отбасы», «Құтты мекен», «Халыққа көмек», «Ауыл — ел бесігі» атты іргелі жобалардың облыс көлеміндегі жүзеге асырылуы да кеңінен сөз болды. Аймағымыз бойынша еңбек ұжымдары мен түрлі сала қызметкерлері арасында партия бағларламасын түсіндіру жұмыстары қарқынды жүргізілуде. Облыстық филиал төрағасының бірінші орынбасары Әнуарбек Мұхтархановтың айтуынша, «Халыққа көмек» жобасы бойынша бүгінгі таңда 3000 адам партия көмегіне жүгініпті. Қазіргі күнге дейін 314 адамның мәселесі толыққанды шешімін тапқан. Сонымен қатар «Бақытты отбасы» жобасы арқылы 38 мың тұрғынға атаулы әлеуметтік көмек көрсету үшін 1,4 млрд теңге бөлініп отыр.
Семей қалалық «Nur Otan» партиясы филиалы төрағасының бірінші орынбасары Айнұр Арғынбекованың бізге берген мәліметіне сүйенсек, «Бақытты отбасы» жобасы бірінші кезекте қаладағы көпбалалы жанұялар мен жас отбасыларды қолдауға бағытталған. Біздің шаһарымызда партия филиалы жанынан Бала құқығын қорғау кеңесі құрылған. Аталмыш жобаны нақты іспен жүзеге асыру мақсатында кеңес мүшелеріне тиісті тапсырмалар жүктелген. Атап айтсақ, әлеуметтік тұрғыдан аз қамтылған отбасыларды тұрғын үймен, жұмыспен, материалдық көмектермен қамту, сондай-ақ заңдық тұрғыдан кеңес беру ісі қарастырылған. Бұл бағытта Семей қалалық партия филиалы бірқатар мемлекеттік органдар, сонымен қатар «Атамекен» ҰКП-мен бірлесіп толыққанды жұмыстар жүргізіп жатыр.
«Құтты мекен» жобасы да аймағымыздағы игілікті істерге жол ашуда. Ә.Мұхтарханұлының сөзіне сүйенсек, биыл облыстық және аудандық маңыздағы жолдарды жөндеу үшін 1,5-2 млрд теңге қарастырылған. Тағы бір әлеуметтік маңызды іс — халықты сапалы ауыз сумен қамту үшін облыс көлемінде 60 жоба қолға алынады.
«Құтты мекен» жобасы ең алдымен ауылдардағы және қалалар мен қала маңындағы елді мекендерде көліктік және әлеуметтік инфрақұрылымдарды дамытуға бағытталған. Бұл орайда Семей қаласында да айтарлықтай жұмыстар жүргізілуде. Шаһардағы 25 шақырымнан астам жолдың жөнделетіні, жаңа автобустардың қолданысқа берілетіні — соның жарқын айғағы.
Бір бұл емес, «Ауыл — ел бесігі» жобасының аясында облысымыз бойынша 82 мың га суармалы жерді игеру көзделіп отыр. 2022 жылға дейін 36 мың бас ірі қара сатылып әкелінеді. Осылайша, ауыл келешегі кемелдене түспек.
Елбасы Жолдауынан туындайтын басымдық – әлеуметтің әлеуетін көтеріп, халықтың табысын және тұрмыс сапасын арттыру. Осы екі тапсырманың орындалуына алдағы уақыттарда да «Nur Otan» партиясы бақылауды күшейтпек.
Қуаныш ЖОЛЫМБЕТ, «Семей таңы»{jcomments off}
