Елбасы халыққа жақындап, олармен сөйлесе білудің қажеттігін, сонда ғана өмір-өзен өз арнасымен ағатынын айтты. ҚР Президенті Қасым-Жомарт Тоқаевтың да шенеуніктерге әлеуметтік желіде өз аккаунттарын ашып, халықпен тығыз байланыс жасауды тапсырғаны сол екен — фейсбукте көк туға жабысқан, Елбасы мен Елтаңбаның көлеңкесінде галстук тағып сықиған, кең кабинеттің төрінде қабақтары қатулы, эмоциясы жоқ жаңа бейнелер қаптап кетті. Шенеуніктің аккаунты екенін бірден білесің…
Сөйтіп, биылғы көктем әлеуметтік желі қолданушыларды шенеуніктердің шегірткедей қаптап, жаппай аккаунт ашуымен таң қалдырды. Бір жағынан, жай күнде қарапайым адамдарға қабылдау бөлмесіне кірудің өзі қиын болып жүрген шенеунікпен әлеуметтік желі арқылы байланысқа шығуға, өз ойыңды айтуға мүмкіндік болғаны қолайлы екендігіне дау жоқ…
Қоғам мен биліктің арасындағы бұл байланыс құралының тиімді екендігін түсінген билік өкілдері жоғарыдан тапсырма берілгенге дейін желіде мүлде болған жоқ деп айтсақ, жалған болар… Облыс әкімінің орынбасары Әсем Нүсіпова, Семей мен Өскеменнің әкімдері Ермак Сәлімов пен Жақсылық Омардың аккаунттарын дөңгелетіп, өз жұмыстарын желіде бұрыннан көрсетіп жүргендерінен көпшілік хабардар. Билік пен бұқара арасындағы қарым-қатынасты дұрыс жолға қоюға, ауыл, аудан, облыстағы түйінді проблемаларға қатысты елдің тамырын басып отыруға әлеуметтік желінің қолайлы құрал екендігін біреу түсінсе, ал қайсыбіреулер артық сауал немесе өтінішпен мазалайды деп жасқанатын да сияқты…
Сонымен, екі облыстың, бірнеше ауданның әкімімен дос болдық. Бүгін дәурені жүріп тұрған әлеуметтік желілердің «жаңа тұрғындары» не жазар екен деген ой да жоқ емес… Біз басқа аймақтың емес, өзіміздің өңірдегі мемлекеттік қызметкерлердің желідегі жазбаларына көбірек назар аударуға тырыстық.
Жасыратыны жоқ, өз басым не таным, не сарказм жоқ жазбаларды оқудан тез жалығып кеттім. Авторлардың жазу стилінің де ресми жиналыстардың хаттамасынан еш айырмашылығы жоқ. Ал фото!!! Айналасын қоршаған «уәзірлерінің» ортасында қолын сермеп бағыт беріп тұрған басшының бейнесі, бәлкім, біреулерге қызық та болар… Ешқандай идеяға негізделмеген жаттанды пиарға аз уақытта халық елең етпейтін болды деп ойлаймын..
Арайлап атқан таңын әлеуметтік желідегі ағайынның амандығын білуден бастайтын, қолы босай қалса, телефонға телміретін, смартфонын «жастанып» жатып ұйқыға кететін көпшілік биліктің байланысқа шыққанына алғашқыда қуанса, бүгін олардың күнделікті ауыл аралап, ағаш егіп, қол астындағыларына тапсырма бергендері жайлы есептерін қарағысы келмейтінін байқау қиын емес.
Көк тудың астында шіреніп тұрған суреттер мен ресми жазбалар шенеуніктердің халықпен шынайы байланысқа шығуға, бұқарамен жақындасуға әлі дайын емес екендігін аңғартатындай… Елбасының Шымбұлақта шаңғы теуіп, теннис ойнап, домбыра шертіп отырған әдемі суреттері естеріңізде ме? Қараған адамның көңілін көтеретін сондай көріністерді халықтың жақсы қабылдайтынын еске сала кеткіміз келеді.
Тіпті ешқандай идеяңыз болмаса, сымбатымен де, білімділігімен де бүкіл әлемнің сүйіктісіне айналған Канада премьер-министрі Джастин Трюдоның аккаунтын ашып қараңыздаршы. Канаданың үкімет басшысы бірде рингте боктасып жатса, енді бірде ерекше шұлық кию үлгісімен көпшілікті таң қалдырып жүр. Бір халықаралық форумға Джастин Трюдо «Жұлдыздар шайқасы» фильміндегі Чубакка атты кейіпкердің суреті бейнеленген шұлық киіп келсе, НАТО одағына кіретін елдер басшылары мен премьер-министрлері Брюссель қаласында бас қосқан жиынға НАТО ұйымының логотипі бейнеленген қызыл шұлық киіп келіп, көпшілікті аяғына қаратқан. Әлеуметтік желіде жарияланған Джастин Трюдоның Германия канцлері Меркельге өзінің шұлығын көрсетіп, мақтанып тұрған суретін қысқа уақыт ішінде бүкіл әлем тамашалаған болатын. Біреулер мұны ерекшеленудің жолы десе, біреулер әуесқойлық, ал қайсыбіреулер саясат дейді. Кім білсін?! Қалай болғанда да Канаданың премьер-министрі — тек үкімет басшысы ретінде ғана емес, ақылды әрі түрлі саладағы ілімді жетік меңгерген, өз елінің патриоты ретінде әлем назарында жүрген саясаткер.
Шешен елінің президенті Рамзан Қадыров Инстаграм, Фейсбук, Твиттер, Вконтакте атты әлеуметтік желілердің бәрінде тіркелген. Бірде ресми жиналыс үстінде телефон арқылы байланысқа шыққан анасымен сөйлесіп болып, жанында тұрған Ресей президенті Путинге: «Мама звонит!» дегенін көрсеткен бейнежазбасын, ал енді бірде бала-шағасының ортасында бос уақытын қалай өткізгенін халық қызыға тамашалайды. Ал Дмитрий Медведев жүрген жерінің тамаша көріністерін суретке түсіріп алып, әлеуметтік желідегі достарымен бөлісіп жүр.
Біздің ойымызша, тапсырманы орындауда «үздіктер» синдромымен «ауыратын» көпшілік әкімдер бүгін әлеуметтік желіні ашып қойып, ары қарай не істеуді білмей отырған сияқты. Мүмкін, бұл орайда арнайы семинарлар өткізу де қажет болар… Өйткені әлеуметтік желідегі тым ресми суреттер мен істеген жұмыстары жайлы есепті тізген ақпараттар билік пен халықтың арасын жақындата алмайтыны белгілі.
Әрине, әкімдерге мультфильм кейіпкерлері бейнеленген қызылды-жасылды нәски киіп ерекшеленіңдер деп кеңес беруден аулақпыз. Дегенмен, ел ардақтаған азаматтар, бір сәт галстуктеріңізді шешіп, көк тудың тасасынан шығып, екі қадам алға басыңыздаршы…
Айтпақшы, ЭМОЦИЯ!!! Қатулы қабақты сәл жымиып жылытсаңыз тіпті қатып кетер еді. Осыдан кейін халықтың өзіңізге жақындай түсетініне күмәніңіз болмасын.
Риза Асанқызы, «Семей таңы»
{jcomments off}
