Құрметті семейліктер!
Дәстүр бойынша, 1 мамыр күні біз Қазақстан халқының бірлігі күнін, достық пен келісім, бейбітшілік пен тұрақтылық мерекесін атап өтеміз. Бірліктің арқасында біз көп ұлтты елімізде бейбіт өмір сүріп жатырмыз.
Тәуелсіздік алғаннан бері біздің еліміздің басты бағыты, Қазақстан халқы Ассамблеясының қызметі барша ұлт өкілдерінің өз мәдениетін дамытуға, ана тілін, салт–дәстүрлерін сақтауға тең құқықты болуына негізделген.
Бұл — Елбасы Нұрсұлтан Әбішұлы Назарбаев қалыптастырған салмақты саясаттың жемісі. Соның негізінде елімізде саяси тұрақтылық, қоғамдық келісім, ұлтаралық ынтымақ орын алды. Экономикамыз дамып, әлеуметтік мәселелер кешенді түрде оң шешілуде.
Бүгін, әлемдегі күрт өзгерістер қарсаңында, қазақстандықтар қоғамды нығайтуға, азаматтық бейбітшілік пен келісімді сақтауға барлық күш-жігерін жұмсауы қажет. Біздің міндетіміз – қазақстандық патриотизмнің дәстүрлерін сақтау және арттыру!
Ұлтаралық татулық пен ұлыстар ынтымағы Семей өңірінде де кең қанат жайып, қоғамдағы тұрақтылық арта түсуде. Қаламыздың гүлденіп, экономикамыздың жақсарып келе жатқаны барша семейліктердің мемлекет саясатын барынша қолдағандықтарының нәтижесі деп білеміз.
Қымбатты жерлестер!
Айтулы мерекемен шын жүректен құттықтай отырып, баршаңызға зор денсаулық, отбасыларыңызға құт — береке, бақыт тілейміз.
Еліміздің еңсесі биік, тұғыры берік, болашағы мәңгілік болсын!
Құрметпен, Семей қаласының әкімі Ермак СӘЛІМОВ
Қалалық мәслихаттың хатшысы Бейсенбек АҚЖАЛОВ{jcomments off}