Дүйсенбі, 6 мамыр күні Қалалық Мәдениет сарайында қала әкімі Ермак Сәлімовтің, соғыс және тыл ардагерлерінің қатысуымен 7 Мамыр – Отан қорғаушылар күніне және Жеңістің 74 жылдығына арналған салтанатты кеш өтті.
Қала әкімі Ермак Сәлімов ардагерлер мен қала тұрғындарын мерекемен құттықтады.
— Қымбатты соғыс және еңбек ардагерлері, қадірлі Отан қорғаушылар! Баршаңызды Ұлы Жеңіс және Отан қорғаушылар күнімен шын жүректен құттықтаймын! Бұл қос мереке елдік пен ерліктің, батырлық пен батылдықтың жарқын үлгісін айшықтайды. Халқымыздың мызғымас бірлігі, қайсар рухы, атамекен, туған жерге деген адалдық – мұның барлығы қанымызға сіңген асыл қасиет. Тарихта еліміздің жүзге бөлініп жүдеген, бас қосып бірігіп үдеген кездері аз болған жоқ. Қазақ біріксе, қайтпайтын жау, құламайтын қамал болмаған. Сол бірліктің арқасында алдыңғы толқын ардагер ағаларымыз өшпес ерлігімен бейбіт күнді алып берді. Бірліктің арқасында кейінгі толқын дәстүрді жалғап, ерлік даңқын асырып келеді. Олай болса, батырлықтың жібін үзбей, жарқын болашақ үшін жанын берген боздақтар ерлігін мәңгі ұлықтап, кемел келешегіміз үшін бірлесе күш жұмсайық, қадірлі жерлестер. Егемендіктің еңсесі биік, тұғыры берік, ғұмыры баянды, мәңгілік болсын!- деді Ермак Бидахметұлы.
Кеш барысында ардагерлердің құрметіне ҚР еңбек сіңірген қайраткері Ерлан Рысқали, М.Төлебаев атындағы саз колледжінің оркестрі, Мәдениет сарайының әншілері және жастар өнер көрсетті.
Айта кетейік, бүгінгі таңда ШҚО-да 202 соғыс ардагері және 58 оған теңестірілгендер мен соғыс даласында қаза болғандардың 22 жесірі, ал Семей қаласында 39 соғыс ардагері өмір сүруде.
Айтолқын САМАТОВА, «Семей таңы»{jcomments off}
