Сәрсенбі, 22 мамыр күні қалалық әкімдікте ШҚО әкімінің орынбасары Әсем Нүсіпованың төрағалық етуімен ШҚО әкімдігінің жанындағы кәмелетке толмағандардың істері және олардың құқықтарын қорғау жөніндегі облыстық комиссияның көшпелі отырысы болып өтті. Жиынға комиссия мүшелері, қала әкімінің орынбасарлары, облыс қалалары мен аудандарының білім бөлімі басшылары, колледж, балалар үйі директорлары және кәсіптік білім беру ұйымдары өкілдері қатысты.
Комиссия отырысында техникалық және кәсіптік білім беру мекемелерінде білім алып жатқан кәмелетке толмаған жастар арасындағы құқық бұзушылық пен суицидтік мінез-құлықтың алдын алу шаралары, сондай-ақ облыстың денсаулық сақтау ұйымдарының кәмелетке толмағандар арасындағы суицид жағдайларының алдын алу жұмыстары талқыланып, жетім және ата-анасының қамқорлығынсыз қалған балаларға арналған бірқатар білім беру мекемелерін өзгертуге қатысты атқарылып жатқан шаралар туралы; Семей қаласы білім бөлімінің қамқоршылық және қорғаншылық органының 2019 жылдың 1 тоқсанда атқарған жұмысы; «Отбасының физикалық және психоэмоционалдық денсаулығын сақтау» жобасының жүзеге асырылуы туралы мәселелер қаралды.
Бүгінде Шығыс Қазақстан облысында 86 колледж 115 мамандық түрі бойынша 35 мың студентке білім беруде. Студенттердің 20613-і — кәмелеттік жасқа толмаған жасөспірімдер.
ШҚО Полиция департаменті мәліметі бойынша, ағымдағы жылдың 1 тоқсанында жасөспірімдер арасында 51 құқық бұзушылық фактісі тіркелсе, оның 27-сі, яғни 53 пайызы колледж студенттері екен.
Облыс әкімінің орынбасары, кәмелетке толмағандардың істері және олардың құқықтарын қорғау жөніндегі облыстық комиссияның төрайымы Әсем Бекқызы биылғы жылдың алғашқы тоқсанында былтырғы жылдың осы кезеңімен салыстырғанда кәмелетке толмағандар арасындағы құқық бұзушылықтың төрт жағдайға артып отырғанын жеткізді.
— Бұл — тиісті шаралар қабылдауды талап ететін алаңдатарлық жағдай,- деп атап өтті Әсем Нүсіпова.
ШҚО Білім басқармасы кәсіптік және техникалық білім беру бөлімі басшысы Гүлмира Искакованың мәліметі бойынша, жасөспірімдер көбінесе ұрлық, тонау, тәртіп бұзушылық сынды құқық бұзушылықтар жасайды екен. Биылғы жылы осындай 18 оқиға тіркеліпті.
— Облыста кәмелетке толмағандардың істері бойынша 197 инспектор бірінші кезекте мектептермен жұмыс жүргізеді. Олар орта арнаулы оқу орындарына да толыққанды көмек көрсете алады. Колледждерде үйірме, секция, құқық бұзушылықтың алдын алуға қатысты кеңестер жұмыс істейді. Колледж оқушылары құқық қорғау органдары мен денсаулық сақтау бөлімдері тарапынан жүргізілетін жедел алдын алу шараларына белсене қатысады. ШҚО Білім басқармасы басшылығымен 53 техникалық және кәсіптік білім беретін оқу орнында құқық бұзушылықтың алдын алу мақсатында «Полицияға көмек көрсету жасағы» жобасы қолға алынған. Бұл жобаға да студенттер атсалысуда. Сондай-ақ колледждерде медиация бойынша да жоба іске асуда, екі рет шеберлік сыныбы өткізілді. Орта арнаулы оқу орындары үкіметтік емес ұйымдармен, «Феникс», «Жанұя орталығы» ҚБ, Аналар кеңесімен бірлесе жұмыс жүргізеді,- деді баяндамасында Гүлмира Искакова.
Жиын барысында жасөспірімдер арасындағы құқық бұзушылықтың басым бөлігі аз қамтылған, сәтсіз, толық емес отбасыларда тәрбие алып жатқан балалардың қатысуымен орын алып отырғандығы айтылды. Алайда құқық бұзушылықтардың себебін көпбалалы, сондай-ақ қолайсыз отбасылардан іздемеу керектігіне ерекше назар аударған облыс әкімі орынбасары Әсем Бекқызы мұндай түсінік жаңсақ екендігін бірден кесіп айтты. Бұл ретте бала немесе отбасы емес, жасалынып жатқан жұмыстардың нашарлығы, тиісті жағдайдың жасалмауы, тәрбие жүйесіндегі кемшіліктер, жекелеген ата-аналардың жауапсыздығы құқық бұзушылыққа алып келетінін алға тартты.
— Иә, жұмыс жүргізіліп жатыр. Жақында «Worldskils», IT-фестиваль өткіздік, бұл балаларды білім және бос уақытын тиімді пайдалану үрдісіне тартудың үлгісі болып табылады.
— Облыстағы білім саласына жауапты болғандықтан және комиссия төрайымы ретінде менің жеке көзқарасым – жасөспірімдердің құқық бұзушылыққа жол беруіне олардың жайсыз немесе көпбалалы отбасында тәрбиеленуі себеп болды деп айтуға құқығымыз жоқ. Барлық отбасындағы балалар бірдей. Себепті өзімізден, өзіміздің жұмысымыздан іздеуіміз қажет,- деп ескертті облыс әкімінің орынбасары Әсем Нүсіпова.
— Барлық тиісті құрылымдар мен мекемелердің жұмысын студенттер арасындағы келеңсіз жағдайларды жоюға бағыттау керек,- деген комиссия төрайымы Әсем Бекқызы студенттер арасындағы құқық бұзушылықтың алдын алуға бірлесе жұмылу қажеттігін баса айтты.
Роза Мауылханқызы, «Семей таңы»{jcomments off}
