Алакөлге іссапары барысында аймақ басшысы Даниал Ахметов көл жағалауында атқарылып жатқан жұмыстарды көріп, аудан басшылығына тапсырмалар берді.
Алакөлге келетін туристер енді, тынығумен бірге, ел тарихымен танысатын болады. Осы мақсатта өткен жылы Қабанбай ауылындағы мәдениет үйі қайта жаңғыртылып, оның ішінен музей ашылған болатын. 6 экспозициялық залдан тұратын мұражайда Шіліктіден табылған «Алтын адам» мен «Үржар ханшайымының» көшірмелері және басқа да жәдігерлер топтастырылған. Мұнда оқырман қауым үшін кітапхана да бар. Мұражаймен, кітапханамен танысу барысында Даниал Ахметов:
— Кешегі ата-бабаларымыз тұтынған тұрмыстық бұйымдар, керамикалық ыдыс-аяқтар, әшекейлер, жалпы, көне дәуірдегі көптеген құнды заттарды біз ерекше бағалауымыз керек. Мәселен, ағаштан жасалған кеселер мен басқа да ыдыс-аяқтар қазіргі күні экологиялық тұрғыдан ең таза, зиянсыз болып табылады,-дей келе, кітапхананы кеңейтуді және «Виртуалды шындық» залын, келушілер мен тұрғындар үшін компьютер кабинетін ашуды тапсырды.
Балалар үшін жағдай жасау қай уақытта болсын маңызды. Алакөл жағалауында орналасқан Ішкі істер министрлігінің иелігіндегі бос тұрған шипажай ғимаратын жөндеуден өткізіп, бүлдіршіндерге арналған емдеу-сауықтыру орталығын ашу бағытындағы тапсырмаларды облыстық білім басқармасы басшысы Сайрангүл Жұмәділоваға жүктеген Даниал Ахметов:
— Ағымдағы жылы ғимаратты жөндеуді бастауымыз керек. Жері кең. Жанынан тағы бір нысан тұрғызамыз. Балалар — біздің болашамыз. Балаларға арналған тамаша орындар қажет. Мұнда көпбалалы, аз қамтылған отбасылардың балалары демалып, емдік процедуралар қабылдайтын болады,- деді.
Айта кетсек, бұл нысанды қайта жаңғыртудың жобалық-сметалық құжаттамалары бір ай ішінде дайын болуы қажет.
Алакөлдің жағасынан салынатын лагерь бір ауысымда 220 баланы қабылдай алады екен. Қазіргі таңда аталмыш бағытта біршама жұмыстар жүргізіліп жатыр. Облыстық білім беру басқармасының басшысы Сайрангүл Жұмаділованың айтуынша, сауықтыру лагерінде ерекше күтімге зәру балалар денсаулықтарын нығайтып қана қоймай, бос уақыттарын ойын-сауықпен, түрлі спорттық шаралармен әрі танымдық бағдарламалармен тиімді өткізуге мүмкіндік алатын болады.
Жұмыс сапары барысында Даниал Кенжетайұлы бірқатар демалыс үйлері жағалауға тым жақын салынғанын айтып, сынға алды. Арнайы комиссия құрып, бұл мәселені тез арада шешуді тапсырды. Келесі кезекте Даниал Кенжетайұлы көлдің сол жақ жағалауында орналасқан саябаққа ат басын бұрды. Жасыл желекке оранған демалыс орнында субұрқақ, «Street Workout»пен шағын футбол алаңдары бар. Аймақ басшысы аудан әкімі Серік Зайнулдинге саябақты одан әрі көгалдандыруды және кеңейтуді тапсырды. Саябақ көркейтіліп, екі жағынан да жиырма метрге дейін кеңейтіліп, абаттандырылатын болады.
ШҚО әкімінің баспасөз қызметінің ақпараты негізінде әзірленді.{jcomments off}
