Қазақстанда, әсіресе Семейде тұрғын үй – өзекті мәселелердің бірі. Семейдің өзінде мыңдаған адам тұрғын үй кезегінде тұр. Ұзақ жылдар бойы жалдамалы пәтерді мекен еткен тұрғындар кездесу барысында шаһар басшысынан тұрғын үй кезегінің неге соншалықты баяу жүріп жатқанын сұрап, ондаған жылдар бойы пәтерге қол жеткізе алмай жүргендерін айтты.
— Семейде үлкен көлемде тұрғын үй салынған емес. Иә, біраз үй салынды, бірақ олардың саны өте аз. Сонымен қатар жыл сайын Семейге ауылдық жерлерден тұрғындар көшіп келеді. Сондықтан кезек өте баяу қозғалуда және кезекте тұрған адамдардың саны он мыңнан асады, — деді қала басшысы Ермак Сәлімов.
Семейдегі тұрғын үй мәселесі бойынша проблемалар жетерлік. Бірақ соңғы жылдары жағдайдың оңала бастағаны рас. Өткен жылдармен салыстырғанда Семейде тұрғын үй құрылысының көлемі айтарлықтай артты. Егер төрт жыл бұрын қаланың бюджеті 7 миллиард теңгеден аспаса, бүгінде бұл көрсеткіш 74 миллиард теңгені құрап отыр. Қала әкімі бұл өзгерістер туралы жұртшылықпен кездесуінде түсіндіріп айтты.
— Семейде Қарағайлы ықшам ауданы бой көтеруде. Аталмыш ауданда тұрғын үй құрылысы қарқынды жүріп жатыр. Осы үйлер есебінен бірінші кезекте әлеуметтік аз қамтылған азаматтардың тұрғын үй мәселелері шешіледі. Пәтерлердің 20% -ы жетім балаларға берілетін болады. 11 үйдің пәтерлері «Жалдамалы тұрғын үй» бағдарламасы бойынша сатып алу құқығынсыз беріледі, ал құны өте төмен. Бір шаршы метрі 80-100 теңге аралығында. Бүгінде Мемлекет басшысы жалдамалы тұрғын үй салуды нақтылады және осы бағытта қаражат бөлінді. Жоспарланған 30 тұрғын үйдің 25-і биылғы жылы, 5 –еуі келесі жылы пайдалануға берілетін болады. 2020 жылға қарай біз осы бағдарлама аясында 33 үй салуымыз керек. Аймақ басшысы Даниал Ахметов Семейге ерекше назар аударып отыр. Сондықтан биылғы жылы жаңа реформалар күтудеміз,- деді Ермак Бидахметұлы.
Кездесу барысында осы айдың соңына дейін көпбалалы отбасыларға кемінде 50 пәтер берілетіні айтылды. Ал қазан айына таман екі тұрғын үйді жалға беру жоспарланып отыр. Жетім балаларға, сондай-ақ әлеуметтік осал топтарға басымдық беріледі. Қалған пәтерлер толық емес отбасыларға, 1-2-топтағы мүгедектерге, мүгедек балаларды тәрбиелеп отырған отбасыларға, созылмалы аурулармен ауыратын адамдарға және басқа да топтағы отбасыларға қарастырылмақ.
— Жетім балалар мен көпбалалы отбасыларды қоспағанда, халықтың барлық әлеуметтік осал топтары тұрғын үймен қамтамасыз ету кезегінде тұр. Санаттар бойынша тұрғын үйлер теңдей бөлініп беріледі. Биылғы жылы қанша тұрғын үй салынатыны кезекте тұрған отбасылардың құрамына байланысты, — деп түсіндірді қалалық тұрғын үй-коммуналдық шаруашылық және тұрғын үй инспекциясының бас маманы Кристина Гаджиева.
Жалпы алғанда, бүгінгі күні Семей қаласының жергілікті атқарушы органдарының тізімінде 10544 адам тұрғын үй кезегінде тұр. Оның 5106-сы — бюджеттік ұйымдардың қызметкерлері. Мемлекеттік қызметкерлерді тұрғын үймен қамту «7-20-25» немесе «Бақытты отбасы» сияқты ипотекалық несие беру бағдарламалары арқылы жүзеге асырылуда.
Жадыра ТӨЛЕГЕНҚЫЗЫ, «Семей таңы»{jcomments off}
