Биылғы жылы ел тұрғындары алдында Қазақстан Республикасының президентін таңдау сынды маңызды міндет тұр. Президент сайлауы әсіресе өз болашағы үшін таңдау жасайтын жастар үшін айрықша маңызға ие деп білемін.
Білетініміздей, әлемнің жетекші елдері көбінесе жастарға арқа сүйейді. Олардың игіліктеріне жұмсалған шығын болашаққа салынған инвестиция есебінде саналады. Мұның берер пайдасы сан қырлы. Міне, сол себепті де Тұңғыш Президентіміз Нұрсұлтан Назарбаев еліміздегі кейінгі буынға ерекше көңіл бөлу керектігін атап көрсеткен болатын. Елімізде «Болашақ», «Серпін» сынды мемлекеттік бағдарламалар нәтижелі жүзеге асырылуда.
Жастар ісі мемлекеттік саясаттың басымдық берілген бағыты болып табылады десек қателеспейміз. Биылғы жылдың Жастар жылы болып жариялануы — соның айғағы. Ал осы жыл аясында өткізілетін көлемді шаралардың барлығы өз кезегінде еліміздегі жастар қауымына зор міндеттемелер жүктейді. Жас буын әрбір қоғамдық-саяси оқиғаға, соның ішінде президент сайлауына немқұрайлы қарамауға тиіс. Себебі біз тек мемлекет басшысын ғана таңдап қоймаймыз, еліміздің болашақтағы даму жолын да таңдаймыз.
Жастарға мемлекет тарапынан аз көңіл бөлініп жатқан жоқ. Жол картасы әзірленді, әлеуметтік тұрғыдан жәрдем көрсету мақсатында өзге де тиімділігі мол бірқатар шаралар қолға алынды. Сонымен бірге білім гранты мен баспана мәселесі де шешімін тауып жатыр. Жастар қанатының белсендісі ретінде мен өскелең ұрпақтың талабын, ерік-жігерінің мықты екенін жақсы білемін. Олар қазіргі таңда қаладағы барлық іс-шараларға белсенді түрде қатысып, өздерінің азаматтық ұстанымдарын айқын көрсетіп жүр.
Дамудың даңғыл жолына түскен тәуелсіз Қазақстан бүгінде өркендеу үстінде.
Біздің алдымызда тарихи таңдау тұр. «Жалғыз ағаш орман болмас, жалғыз кірпіш қорған болмас» дейді халық нақылы. Сондықтан кезектен тыс президент сайлауына бір кісідей қатысып, еліміздің болашағы үшін, тұтастығы үшін дауыс беруіміз керек.
Мен жерлестерімді 9 маусым күні сайлау учаскелеріне барып дауыс беруге шақырамын. Әрине, қай үміткерге дауыс беретінін әркім өзі шешеді. Ал сайлауға қатысу жалпыұлттық міндет деп есептеймін.{jcomments off}
Арман АЙТМҰҚАШ, Семей қалалық «Jas Otan» ЖҚ бөлімшесінің жетекшісі.