Аймақ басшысы Даниал Ахметов өткізген облыстық әкімдіктегі кеңес барысында қоғамдық көліктерде электронды билеттендіру жүйесін енгізу туралы тарулы мәселелер талқыланды.
Аталмыш жобаның болжамды сомасы миллиард теңгеден асады. Шығынның 70 пайызы жеке инвесторлар есебінен төленсе, қалған 30 пайызы облыстық бюджеттен өтелінбек. Билеттендірудің жаңа жүйесі бойынша бірінші кезекте Өскемен қаласындағы 28 трамвайды қамтамасыз ету қарастырылуда. Одан кейін 558 автобус пен микроавтобус қарастырылмақ. Бұл қоғамдық көліктердің барлығы да диспетчерлер үшін GPS навигаторлармен қамтылмақ.
Мамандардың айтуынша, жол ақысын төлеу арнайы картаны пайдалану бойынша жүзеге асырылады. Алғашқы кезеңде 200 мың дана карта шығарылмақ. Ал содан кейін аталмыш карталар қажетіне қарай тағы да алынатын болады. Мұндай магнитті карталар арнайы орындарда толтырылады, сонымен қатар жеке құрылғылар арқылы да төлемақыны толтыру мүмкіндігі бар болғандықтан мейлінше ыңғайлы.
Осы мақсатта ШҚО жолаушылар көлігі және автомобиль жолдары басқармасы байқау жарияламақ. Ал оның қорытындысын құрамында жергілікті атқарушы органдар өкілдері мен кәсіпкерлер палатасының өкілдері бар арнайы комиссия анықтайтын болады.
— 31 мамырда байқау жариялаймыз. 15 күн бойы оған қатысатындар анықталады,- дейді «ШҚО аймақтық мемлекеттік-жекеменшіктік әріптестік орталығы» АҚ-ның төрағасы Шәкәрім Бұқтығұтов. – Даярлық жұмыстары барысында Қазақстан, Ресей, Беларусьтің бес компаниясы байқау құжаттамаларымен танысып, өз ұсыныстарын енгізді.
Ш.Бұқтығұтовтың сөзіне сүйенсек, жаңашылдықтың енгізілуіне байланысты қоғамдық көліктердегі тариф құны жоғарыламайды. Сонымен қатар ол кондукторлардың да жұмыссыз қалмайтынын, олардың бақылаушы-контролер қызметіне ауысатынын жеткізді.
— Билеттендіру ісін сандық жүйеге ауыстыру – жетістік кілті,- деп түсіндірді Даниал Ахметов. — Алматы тәжірибесі бұл мәселеде жолаушы тасымалдаушылардың табысы төрт есеге дейін артатынын толығымен дәлелдеді. Бізді де осындай жетістік күтіп тұр.
Облыс әкімі жаңа жобаны алдымен Өскемен қаласында, содан кейін Семей қаласында енгізуді тапсырды.
ШҚО әкімінің баспасөз қызметі ақпараты негізінде әзірленді.{jcomments off}
