17 — 27 мамыр аралығында Семей қаласының ядролық медицина және онкология орталығында және емханаларында меланома және тері обыры туралы хабардарлық жөніндегі онкүндік өтті. Онкүндіктің қорытындысы туралы Семей қаласының ядролық медицина және онкология орталығында өткен баспасөз мәслихатында айтылды. Баспасөз конференциясына орталықтың күндізгі стационар меңгерушісі Наталья Карнакова, емдеу жұмыстары жөніндегі директордың орынбасары Қуантқан Жабағин, сандық жүйеге көшіру және мониторинг қызметінің жетекшісі Нұргүл Жұмықбаева қатысты.
Орталық мамандарының мәліметінше, Семей қаласында таралған обыр ауруларының ішінде тері обыры сүт безі обырынан кейін екінші, ал республика көлемінде Шығыс Қазақстан облысы бірінші орында тұр. Дер кезінде мамандар көмегіне жүгінбегендіктен, қаламызда жылына онға жуық адам осы ауру түрінен көз жұмады екен.
Дәрігер Наталья Карнакованың айтуынша, әр адам дене терісінің жай-күйіне көңіл аударып отырса, бұл ауру түрін ерте анықтау қиын емес көрінеді.
— Меланома қан тамыры арқылы тарайды. Меланома мен тері обыры аурулары бойынша ШҚО еліміздің басқа өңірлері арасында көш бастап тұр, — дейді Наталья Карнакова. — Көбі бұл тек тері обыры деп ойлайды. Меланома шырышты қабықта, ауыз қуысы мен қынапта да болуы мүмкін. Соңғы кезде тырнақ астындағы мелонамалар көбейіп кетті. Бұған әйелдердің маникюр, педикюр жасағанда пайдаланатын препараттары да әсер етуі мүмкін. Тұрғындарды сақ болуға шақырамыз. Күн астында көп жүру, күнге күю аурудың пайда болуына әсер етеді. Сондықтан ыстық күн астында ұзақ уақыт болмауға, күнге қарсы жақпамайлар пайдалануға кеңес береміз,- дейді Н.Карнакова.
Меланома және тері обыры туралы хабардарлық жөніндегі онкүндік Семей медицина университетінің клиникалық және радиациялық онкология және тері аурулары кафедрасымен бірлесе өткізілген. Нәтижесінде Семей өңірінің 732 тұрғыны дәрігер онкологтерге алдын ала жазылмай-ақ тегін кеңестер алған. Онкүндік аясында өңірдің 13 медициналық мекемесінде қабылдау жүргізілген. Бір күн ішінде тері обыры мен меланомаға 18 күдікті жағдай, 114 обыралды аурулары және 251 басқа аурулар анықталған. Ісіктері бар пациенттер қосымша тексерілуге жіберілген.
— Біздің басты мақсатымыз – обырды ерте кезеңінде анықтау. Бұл жағдайда ауруды емдеуге болады. Семейлік тұрғындарды сақ болуға, денсаулыққа мән беруге, денсаулығына қатысты мәселе туындаған жағдайда емханаға келіп дәрігер кеңесін алуға шақырамыз. Тері обыры ауруы аса қауіпті болмаса да, маман көмегіне уақтылы жүгінбегендіктен, жылына онға жуық адам көз жұматыны анықталып отыр. Обыр ауруларын анықтауда емханалардағы тексерулер маңызды,- дейді Н.Жұмықбаева.
2019 жылдың 4 айының қорытындысы бойынша Семей өңірінде 60-қа жуық адамда аталмыш диагноз анықталған.
Жадыра Төлегенқызы, «Семей таңы»{jcomments off}
