Өткен жұмада, халықаралық балаларды қорғау күні қарсаңында қаламыздағы №22 мектеп-лицейде «Самұрық-Қазына» АҚ компаниясының демеушілігімен әмбебап спорттық және балалар ойын алаңы ашылды. Алаңның ашылу салтанатына қала әкімі Ермак Сәлімов, «Samruk-Kazyna Trust» әлеуметтік жобаларды дамыту қоры корпоративтік коммуникациялар Департаментінің директоры Мирас Іргебаев, қалалық дене шынықтыру, спорт және туризм бөлімінің басшысы Мұрат Құржықаев, қалалық мәслихат хатшысы Бейсенбек Ақжалов, қала тұрғындары, мектеп-лицей түлектері, ата-аналар балалар қатысты.
«Самұрық Қазына» АҚ компаниясының «Samruk-Kazyna Trust» әлеуметтік жобаларды қолдау қоры қала тұрғындарына №22 мектеп-лицейінің аумағынан спорт алаңын тарту етті. 1280 шаршы метр аумақты алып жатқан алаң үш аймақтан тұрады: футбол алаңы, балалар ойын алаңы, тренажер алаңы немесе Street woorkout. Футбол алаңына жасанды көгал, балалар ойын алаңы мен Street woorkout алаңдарына жарақат алу мүмкіндігін азайтатын тартан атты резиналық жабынды төселген.
— Құрметті жерлестер, ата-аналар, балалар! Бүгін, қасиетті Рамазан айында, Сіздермен осындай игі шарада жүздесіп отырғаныма қуаныштымын. «Самұрық-Қазына» АҚ компаниясына алғыс айтамыз. Оқушыларымыз спорттың биігіне көтеріліп, чемпион атансын, — деді қала әкімі Ермак Бидахметұлы.
«Samruk-Kazyna Trust» әлеуметтік жобаларды дамыту қоры ата-анасының қарауынсыз қалған балалар мен аз қамтылған отбасылардың балаларын қолдауға бағытталған жобалармен қатар, «Менің елім» әлеуметтік инвестициялар бағдарламасын жүзеге асырып келеді.
— Спор алаңдарын ашудағы мақсатымыз — тұрғындар мен балаларды салауатты өмір салтына баулу. Шығыс Қазақстан облысынан бастау алып отырған жоба алдағы уақытта еліміздің 40-қа жуық өңірінде жалғасатын болады. Бүгін сонымен қатар Түркістан, Павлодар, Атырау облыстарында осындай спорт алаңдары ашылуда. Шара бұдан әрі Ақтоғай, Аягөз қалаларында жалғасатын болады, — дейді М.Іргебаев.
Нысан қалалық әкімдіктің қарауында берілді.
Айтолқын САМАТОВА, «Семей таңы»{jcomments off}
