Қатерлі ісікті зерттеу бойынша халықаралық агенттік Семей ғалымдарының тәжірибесімен танысты.
Қала әкімі Ермак Сәлімов Халықаралық қатерлі ісікті зерттеу агенттігінің қоршаған орта және радиация бөлімінің басшысы Йоахим Кристофор Шуцпен және радиация саласындағы зерттеу жұмыстарының басшысы Евгения Остроумовамен кездесті.
Кездесу барысында К.Шуц әкімге қаланың бірқатар көрікті жерлерімен танысқанын айтты. Шетелдік қонақты «Өлімнен де күшті» монументі ерекше таңғалдырған екен. Сонымен қатар ол жергілікті ғалымдар зерттеулерінің халықаралық маңызға ие екенін атап өтті.
— Біздің басты мақсатымыз – қатерлі ісіктің алдын алу және қатерлі ісік ауруларын зерттеу,- деді К.Шуц. — Біз ісікті тудыратын себептерді зерттеп, халық арасында аурудың алдын алу әдістерін әзірлейміз. Бұл тұрғыда сіздердің радиациялық медицина және экология ғылыми-зерттеу институтының маңызды рөл атқаратынын мойындаймыз. Бұл жердегі ақпарат халықаралық қоғамдастық үшін өте маңызды.
— Мен сіздерге көп қырлы жұмыстарыңыз үшін алғыс айтқым келеді,- деді Ермак Бидахметұлы. – Біздің институттың тәжірибесінің осы аурумен күресу жолында маңызы жоғары. Көптеген жылдар бойы ядролық құбжық үнсіз. Бірақ ғалымдар оның салдарымен қалай күресу керектігін айтып беруге тиіс. Біз өз өкілеттіктеріміз шеңберінде туындаған барлық мәселелерді шешуге дайынбыз.
Кездесу соңында Е.Сәлімов Мемлекет басшысының Семей қаласына жасаған іссапары кезінде Семей ядролық полигонынан зардап шеккендерді оңалтумен белсенді айналысу туралы тапсырма бергенін еске салды.
Семей қалалық Ақпарат орталығы{jcomments off}