Ырғызбай Досқанаұлы атын-дағы әлемдік Гран-при жарысына дайындық қарсаңында Тарбағатай ауданына жұмыс сапарымен Шығыс Қазақстан облысының әкімі Даниал Ах-метов келді. Өңір басшысы шығыстағы киелі жерлер картасына енген Ырғызбай кесенесінде болып, баба рухына тағзым етті.
Кесене басындағы кітапхана мен «Атамұра» мұражайын аралап көрген аймақ басшысы кешеннің абаттандырылуына көңілі толатынын айтты. Даниал Кенжетайұлы сонымен қатар әлемдік Гран-при додасының ұйымдастырушыларымен кездесу өткізіп, облыстық ардагерлер кеңесінің көшпелі отырысына қатысты. Облыс әкімі «Рухани жаңғыру» бағдарламасының тағы бір жемісі болып табылатын игі бастама — бүкіл әлем көз тігіп отырған Ақсуатта өтетін дүбірлі жарыстың деңгейін көтеруге байланысты ой-пікірін ортаға салды. Облыстың, ауданның атын әйгілейтін, жас ұрпақты отансүйгіштік рухта тәрбиелеуге ықпал ететін спорт додасына отыздан астам елдің балуандары келіп қатысатын болса, алдағы уақытта оны дүниежүзілік ойындар, мысалы, Қырғызстанда өтетін Дүниежүзілік көшпенділер ойындарынан кем түспейтін дәрежеге жеткізу керектігін айтты. Ол үшін жобаны қаржыландыру мәселесінің шешілетінін де жеткізді. Келесі жылдан бастап облыста түркі елдерінің кинофестивалін өткізу жобасы қарастырылып жатқанын тілге тиек еткен облыс басшысы Ырғызбай Досқанаұлы атындағы халықаралық жарысты да сонымен байланыстырып ұйымдастыруға мүмкіндік бар екенін мәлімдеді.
«Тұғыры биік Тарбағатай» атты мәдени-спорттық фестиваль бағдарламасында қазақ күресінен белдесулер, «Туған жерге туыңды тік» тақырыбымен халықаралық ақындар айтысы, «Ұлы дала қазанаты» атты 140 шақырымдық аламан бәйге, атақты боксшы Қанат Исламның қатысуымен кәсіпқой боксшылар сайысы өтетіні осы кездесуде сөз болды. Журналистер сауалына жауап бере келе облыс басшысы кесенеге апаратын жолдың жөнделетінін де жеткізді.
Қоңыр әулие сияқты киелі, мінажат орындарының бірі Ырғызбай кесенесіндегі кездесуге аймақ басшысының орынбасары Шалқар Байбеков, Тарбағатай ауданының әкімі Серікқазы Садуақасов, Қазақстан мұсылмандары діни басқармасының Шығыс Қазақстан облысы бойынша өкілі, облыстық «Халифа Алтай» мешітінің бас имамы Ермек Қасболатұлы Мұқатай қажы, Шығыс Қазақстан облыстық ақсақалдар алқасының төрағасы Манарбек Мұхамеджанов, Тар-бағатай ауданы соғыс және еңбек ардагерлері кеңесінің төрағасы Мұхан Сахариев, қазақ күресінің бүгінгідей дәрежеге жетуіне сүбелі үлес қосып жүрген спорт жанашыры, Дүниежүзілік қазақ күресі федерациясының вице-президенті Бәделхан Камалханұлы, «TasGroup» компаниялар тобының басшысы Дулат Тұрсынұлы қатысты.
Хамза СӘТИЕВ, «Семей таңы»
