Жексенбі, 16 маусым күні қала әкімі Ермак Сәлімов Ұшақтар кентінің тұрғындарымен кездесіп, аталған ауданды жарықпен және сумен қамту мәселесі биылғы жылы шешілетінін айтты.
Ұшақтар ауданының тұрғындары 10 жылдан астам уақыт бойы жарық пен су тапшылығын көріп келеді. Қала әкімі Ермак Сәлімовтің араласуымен биылғы жылдың қараша айына дейін ауданда 12 жыл болмаған су және жарық желілері тартылмақ.
Қазіргі күні Ұшақтар ауданында 762 жер телімі тіркелген. Оның ішінде 300-ден астам уақытша салынған баспаналар мен құрылысы аяқталған үйлер бар. 393 үйдің тіркеу құжаттары реттелуде.
— Ұшақтар ауданында, су, жарық желілерінің жоқтығына қарамастан, осыған дейін әкімдікте жер телімдері сатылған. Шындығында, жер берілмеуі тиіс болатын. Дегенмен бұл мәселені әрі қарай қозғамаймын, — деді Е.Сәлімов.
Қалалық әкімдік мердігер мекемелермен келісімшартқа отырған. Қазір керекті құрал-жабдықтарды сатылып алынуда.
— Ұшақтар кенті тұрғындары үшін басты мәселе – электр энергиясының жоқтығы. Ауданда жаңадан салынған үш қабатты жабдықталған мектеп болғанымен, балаларымыз қараңғыда сабақ оқиды. Ғаламторға, компьютерге де қосыла алмаймыз. Сондықтан жарық бізге ауадай қажет. Мұнда 10 жылдан артық уақыт тұрамын, жарық болған емес. Біраз бұрын тұрғындар өз күшімізбен «Семей Водоканал» МКК арқылы бірнеше үйге су кіргіздік. Орталық су колонкалары Юность ауданына қарай орналасқан, бізден алыста, — дейді Ұшақтар кентінің тұрғыны Селиха Қалиева.
— Қазір біз үшін маңыздысы — ауданға жарық пен су тарту. 13 маусым күні электр энергиясын тартумен айналысатын мекемемен келісімшартқа отырдық. Қазір аталмыш компания Комсомол кентіне электр желілерін тартумен айналысуда. Қараша айында Ұшақтар кентіндегі әр үйде су мен жарық болады. Ал жол жөндеуді кейінге қалдырамыз. Дегенмен сіздер ұсынған орталық көшелердің біріне грейдер жүргізіледі. Семейдің 2025 жылға дейінгі даму жоспарына сәйкес, жолдардың 90 пайызы жаңарады. Бұл бағытта жылына 1,5 млрд. теңге бөлінеді, — деді қала әкімі Ермак Бидахметұлы.
Сонымен қатар тұрғындар Ұшақтар кентіне қатынайтын қоғамдық көліктердің қозғалыс кестесін сақтамайтынын айтты.
— Қаладағы қоғамдық көліктер таңертең және халық жұмыстан қайтатын уақыттарда ғана жақсы жүреді. Демалыс күндері және түскі үзіліс кезінде автобустарды сағаттап күтеміз. Оның үстіне Ұшақтар кентіне қатынайтын автобустар кейде аялдамаға келмей, айналып өтіп кетеді. Балалар кешке қарай қосымша сабақтардан қайта алмай қалады, — дейді тұрғындар.
Қала әкімі тамыз айында жолаушылар тасымалдайтын мекемелерге конкурс жарияланатынын және қыркүйекте 170 жаңа автобустың жолға шығатынын айтып, сабыр сақтауларын өтінді.
Тұрғындар көтерген өзге де мәселерге қатысты қала әкімі тиісті бөлім басшыларына тапсырмалар жүктеді.
Жадыра ТӨЛЕГЕНҚЫЗЫ, «Семей таңы»{jcomments off}