Елімізде 20 маусым мен 5 шілде аралығында Ұлттық бірыңғай тестілеу өтуде. Биылғы ҰБТ жүйесінде қандай өзгерістер бар? Бұл туралы Семей қаласының Шәкәрім атындағы мемлекеттік университеті жанындағы ҰБТ өткізу пункті жетекшісі Болатбек Көжебаев айтып берді.
Болатбек Көжебаевтың айтуынша, биылдан бастап мектеп түлектері ұлттық бірыңғай тестілеуді төрт рет тапсыра алады: қаңтар, наурыз, маусым және тамыз айларында. Бұл түлектердің жоғары оқу орнына түсу мүмкіндігін жоғарылатпақ. Соның ішінде негізгісі — маусым айындағы емтихан. Ал өзге үш емтихан ақылы түрде оқитындарға арналған. Биылғы ҰБТ-дағы тағы бір ерекшелік — IELTS, TOEFL сертификатын алған түлектер ағылшын тілінен емтихан тапсырудан босатылып, автоматты түрде 40 балды еншілейді.
Сонымен қатар колледж студенттері өз мамандықтары бойынша білімін жоғары оқу орнында жалғастырғысы келсе, әңгімелесуден ғана өтеді. Яғни кешенді тест тапсырудан босатылады.
Колледж студенттері мен өткен жылы мектеп бітірген түлектерге арналған кешенді тестілеу ҰБТ тапсырушылармен қатар өтеді.
— ҰБТ тапсырушылардың 5 легі бар. Биылғы мектеп түлектері үш лекте, кешенді тестілеуден өтушілер екі лекте тест тапсырады. Ал тест форматы өткен жылдағыдай.
Биылғы ҰБТ–дағы тағы бір жаңашылдық – білім беру бағыттарының классификаторы енгізілді. Түлектер оқу орнына түсерде өтініш берерде, білім беру бағдарламаларына сәйкес білім беру топтарын таңдайтын болады. Яғни, әр топта бір немесе бірнеше мамандық иелері оқиды. Осыған дейін мамандықтардың нақты тізімі бойынша грант бөлініп келсе, енді гранттар нақты мамандықтарға емес, білім беру бағдарламасына бөлінеді.
— Семейде ҰБТ 22 маусымда басталады. Ал апелляцияға өтініш ҰБТ тапсырған күннің ертеңінде қабылданады. Шәкәрім университетінде ҰБТ 22, 24, 26 маусым, апелляцияға өтініш қабылдау 23, 25, 27 маусым күндері өтсе, кешенді тестілеу 29-30 маусым аралығында. ҚазИГЗУ-де тестілеу 24, 26 маусым күндері, апелляцияға өтініш қабылдау 25, 27 маусым күндері жүргізіледі,- дейді Б.Көжебаев.
— Апелляцияға өтініш қабылдау тест тапсырмасының мазмұнына және техникалық себептерге байланысты жүзеге асады. Тест тапсырмасы дұрыс құрастырылмаса, бір немесе бірнеше дұрыс жауап берілсе, сондай-ақ белгілеген жауапты сканер есептемеген жағдайда ғана тапсырушы апелляцияға өтініш бере алады,- дейді Б.Көжебаев.
ҰБТ өткізу пунктінің жетекшісі Болатбек Көжебаевтың айтуынша, тест тапсырушылар қатаң бақылауда болады. Әр кабинетке бейнекамералар, ұялы телефон байланысын, 3G және 4 G интернет байланысын сөндіргіш құрылғылар қойылады. Медициналық пункт пен дәліз де бақыланады. Әр оқушы ғимаратқа кірерде мемлекеттік комиссия тарапынан металл іздеуші құралдармен тексеріледі. Гаджет, смартфон, калькулятор қолдануға тыйым салынған. Егер бұл талаптарды орындамай, тест тапсырмаларын суретке түсірген жағдайда, тест нәтижесі жойылады.
Айта кетейік, биыл ұлттық жоғары оқу орындарына түсу үшін шекті балл 70, ауыл шаруашылығы мамандықтарына 60, медицина мамандықтарына 65, өзге жоғары оқу орындары үшін 50 балл болып белгіленген. Медицина, педагогика мамандықтары бойынша білім алу үшін психологиялық тест тапсыру міндетті. «Алтын белгінің» бір ғана артықшылығы бар: егер екі талапкер тест қорытындысы бойынша бірдей ұпай жинаса, онда мемлекеттік грант «Алтын белгі» иегеріне беріледі.
Қаламызда биыл 1696 бала 11 сыныпты бітірді. Мемлекеттік қорытынды аттестаттау нәтижелері бойынша 58 түлек «Алтын белгі», 55 мектеп бітіруші үздік аттестат иегері болды.
Жыл сайын мемлекетіміз бюджеттен ҰБТ нәтижелері бойынша конкурстық негізде тағайындалатын білім беру гранттарын бөледі. Сонымен қатар облыс әкімі мен қала әкімінің де гранттары берілетін болады.
Айтолқын САМАТОВА, «Семей таңы» {jcomments off}